പാലക്കാട്: സിപിഎമ്മിനെതിരേ രൂക്ഷ വിമർശനവുമായി സിപിഐ. പാലക്കാട് ഉപതെരഞ്ഞെടുപ്പുമായി ബന്ധപ്പെട്ട് സിപിഐ ജില്ലാ കൗൺസിൽ റിപ്പോർട്ടിലാണ് വിമർശനം. സിപിഎം നേതാക്കളുടെ പരസ്പര വിരുദ്ധ നിലപാടുകളും അഭിപ്രായ അനൈക്യവും പാലക്കാട് നിയമസഭ ഉപതെരഞ്ഞെടുപ്പിൽ ബാധിച്ചു.
തെരഞ്ഞെടുപ്പിൽ ഇടതുമുന്നണി സ്ഥാനാർഥിയെന്നതിന് പകരം സിപിഎമ്മിന്റെ മാത്രം സ്ഥാനാർഥി എന്ന തരത്തിലായിരുന്നു പ്രചാരണമെന്നും പാതിരാറെയ്ഡും ചില പത്രങ്ങളിൽ വന്ന പത്രപരസ്യവും കൂടുതൽ ചർച്ച ചെയ്തത് തിരിച്ചടിക്ക് കാരണമായെന്നും സർക്കാർ പദ്ധതികൾ ജനങ്ങളിലേക്ക് എത്തിക്കുന്നതിൽ വീഴ്ചയുണ്ടായെന്നും റിപ്പോർട്ടിൽ വിമർശനമുണ്ട്. വരും തെരഞ്ഞെടുപ്പിൽ മുന്നണി ഒറ്റക്കെട്ടായി നിന്നാലെ വിജയിക്കാൻ കഴിയു എന്നും റിപ്പോർട്ട് ചൂണ്ടിക്കാണിക്കുന്നു.
