മുൻ മന്ത്രി സി.വി. പത്മരാജൻ അന്തരിച്ചു

കൊല്ലം: മുൻ മന്ത്രിയും കെപിസിസി പ്രസിഡന്‍റുമായിരുന്ന സി.വി. പത്മരാജൻ അന്തരിച്ചു. 93 വയസായിരുന്നു. കൊല്ലത്തെ സ്വകാര‍്യ ആശുപത്രിയിൽ ചികിത്സയിലിരിക്കെയാണ് അന്ത‍്യം. 1982ലും 1991ലും കെ. കരുണാകരൻ മന്ത്രിസഭയിൽ അംഗമായിരുന്നു.

1983-87 കാലഘട്ടത്തിൽ കെപിസിസി പ്രസിഡന്‍റായി പ്രവർത്തിച്ചിരുന്ന പത്മരാജൻ ചാത്തന്നൂർ മണ്ഡലത്തിൽ നിന്നുമായിരുന്നു 1982ലും 1991ലും നിയമസഭയിലേക്ക് തെരഞ്ഞെടുക്കപ്പെട്ടത്.

1982-83 കാലഘട്ടങ്ങളിൽ സാമൂഹിക വികസനം, ഫിഷറീസ് തുടങ്ങിയ വകുപ്പുകളുടെ ചുമതല വഹിച്ചു. 1991 മുതൽ 1995 വരെ വൈദ‍്യുതി, കയർ വകുപ്പുകൾ കൈകാര‍്യം ചെയ്തു. തുടർന്ന് 1995- 1996ൽ ധനകാര‍്യമന്ത്രിയായി. കെ. കരുണാകരൻ ചികിത്സയ്ക്കായി അമെരിക്കയിൽ പോയപ്പോൾ മുഖ‍്യമന്ത്രിയുടെ ചുമതല വഹിച്ചിട്ടുണ്ട്. പിന്നീട് 2005ൽ ആസൂത്രണബോർഡ് വൈസ് ചെയർമാനായും പ്രവർത്തിച്ചു.