തിരുവനന്തപുരം: സര്ക്കാര് ആശുപത്രികളില് വിവിധ സേവനങ്ങള്ക്കുള്ള തുക ഡിജിറ്റലായി അടയ്ക്കാനുള്ള സംവിധാനങ്ങളൊരുങ്ങുന്നു. പിഒഎസ് മെഷീന് വഴിയാണ് ഡിജിറ്റലായി പണം അടയ്ക്കുന്നതിനുള്ള സംവിധാനമൊരുക്കുന്നത്. ഇ ഹെല്ത്ത് പദ്ധതി നടപ്പില് വരുത്തിയിട്ടുള്ള താലൂക്ക് ആശുപത്രികള് മുതല് മെഡിക്കല് കോളെജുകള് വരെയുള്ള എല്ലാ സര്ക്കാര് ആശുപത്രികളിലും ആദ്യ ഘട്ടത്തില് നടപ്പിലാക്കും. ഡെബിറ്റ് കാര്ഡ്, ക്രെഡിറ്റ് കാര്ഡ്, യുപിഐ മുതലായവ വഴി ഈ സേവനം പ്രയോജനപ്പെടുത്താൻ കഴിയും. ആദ്യഘട്ടമായി ഇ ഹെല്ത്ത് നടപ്പിലാക്കിയ 63 ആശുപത്രികളിലാണ് ഈ സംവിധാനമൊരുക്കുക. ഇതിനായി 249 പിഒഎസ് മെഷീനുകളാണ് സജ്ജമാക്കിയിരിക്കുന്നത്. ഇതിലൂടെ ഡിജിറ്റലായി തന്നെ പേയ്മെന്റെ നടത്താവുന്നതാണെന്ന് ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു.
സംസ്ഥാനത്തെ എല്ലാ സര്ക്കാര് ആശുപത്രികളിലും ഓണ്ലൈനായി മുന്കൂറായി ഒപി ടിക്കറ്റ് എടുക്കുന്നതിനുള്ള സൗകര്യം ലഭ്യമാക്കും. 624 ആശുപത്രികളിലാണ് ഇ ഹെല്ത്ത് സജ്ജമാക്കിയത്. ഇ ഹെല്ത്ത് പദ്ധതി നടപ്പിലാക്കിയിട്ടുള്ള എല്ലാ ആശുപത്രികളിലും ഈ സേവനം ലഭ്യമാക്കി വരുന്നു. ഇ ഹെല്ത്ത് പദ്ധതി നടപ്പിലാക്കിയിട്ടില്ലാത്ത താലൂക്ക് ആശുപത്രി മുതല് മെഡിക്കല് കോളെജുകള് വരെയുള്ള എല്ലാ സര്ക്കാര് ആശുപത്രികളിലും ഈ സംവിധാനം നടപ്പിലാക്കും. ആദ്യഘട്ടമായി ഇ ഹെല്ത്ത് ഇല്ലാത്ത 80 ആശുപത്രികളില് കൂടി ഈ സംവിധാനം സജ്ജമാക്കും. മുന്കൂറായി ടോക്കണ് എടുക്കുന്നതിനോടൊപ്പം ആശുപത്രിയില് ഒപി ടിക്കറ്റിന് തുക ഈടാക്കുന്നുണ്ടെങ്കില് അത് ഓണ്ലൈനായി തന്നെ അടയ്ക്കുന്നതിനുള്ള സൗകര്യവും ലഭ്യമാകും.
