കൊല്ലം: കൊട്ടാരക്കര താലൂക്ക് ആശുപത്രിയിൽ ഡ്യൂട്ടിക്കിടെ ഡോ. വന്ദന ദാസ് കുത്തേറ്റു മരിച്ച സംഭവത്തിൽ അന്വേഷണം കൊല്ലം റൂറൽ ക്രൈംബ്രാഞ്ചിന് വിട്ടു. ഇന്നലെ ചേർന്ന ഉന്നതതല യോഗത്തിലാണ് തീരുമാനം. കൊല്ലം റൂറൽ എസ്പി എം.എൽ. സുനിൽ അന്വേഷണത്തിന് മേൽനോട്ടം വഹിക്കും. എഫ്ഐആറിലെ വീഴ്ച്ച പുറത്തു വന്നതിനു പിന്നാലെയാണ് നടപടി.
റിമാൻഡിൽ കഴിയുന്ന പ്രതി സന്ദീപിനെ റൂറൽ ജില്ലാ ക്രൈംബ്രാഞ്ച് കസ്റ്റഡിയിലെടുക്കും. എന്നാൽ പ്രതിയുടെ ഫോൺ പരിശോധിച്ചതിൽ നിന്നും ലഹരി ഉപയോഗവുമായി ബന്ധപ്പെട്ടതോ അക്രമങ്ങളുമായി ബന്ധപ്പെട്ടതോ ആയ ഒരു തെളിവും പൊലീസിന് കണ്ടെത്താനായില്ല, പ്രതിയുടെ ഫോൺ കോളുകളടക്കം വീണ്ടും പരിശോധിക്കും.
