പദ്മനാഭസ്വാമി ക്ഷേത്രത്തിനു മുകളിലൂടെ ഹെലികോപ്റ്റർ : അന്വേഷണം ആരംഭിച്ചു
തിരുവനന്തപുരം: അതീവ സുരക്ഷാ മേഖലയായ പദ്മനാഭസ്വാമി ക്ഷേത്രത്തിന് മുകളിലൂടെ സ്വകാര്യ ഹെലികോപ്റ്റർ വട്ടം ചുറ്റിയ സംഭവത്തിൽ പൊലീസ് അന്വേഷണം തുടങ്ങി. കഴിഞ്ഞ 28 ന് രാത്രി ഏഴോടെയാണു സ്വകാര്യ ഹെലികോപ്റ്റർ ക്ഷേത്രത്തിന് മുകളിലൂടെ താണു പറന്നത്. അസ്വാഭാവികത തോന്നിയ ക്ഷേത്രം ട്രസ്റ്റ് മുഖ്യമന്ത്രിക്കും പൊലീസിനും പരാതി നൽകി. സംഭവം വിവാദമായതോടെയാണു പൊലീസ് അന്വേഷണം ആരംഭിച്ചത്.
പദ്മനാഭസ്വാമി ക്ഷേത്രത്തിനു മുകളിൽ സംശയാസ്പദമായ സാഹചര്യത്തിൽ ഹെലികോപ്റ്റർ വട്ടമിട്ട് പറന്നതിനെക്കുറിച്ചു വിശദമായി അന്വേഷിക്കണമെന്ന് ആവശ്യപ്പെട്ടുകൊണ്ട് ബിജെപി നേതാവ് കുമ്മനം രാജശേഖരനും മുഖ്യമന്ത്രിക്ക് നിവേദനം നൽകി. രാത്രി ഏഴിനു ക്ഷേത്രത്തിൽ പൂജ നടക്കുമ്പോഴാണ് ഇത് ഉണ്ടായത്. ഈ സംഭവം യാദൃച്ഛികമെന്നു കരുതാനാവില്ല. ഒറ്റപ്പെട്ട സംഭവമായി തള്ളിക്കളയാനാകില്ലെന്നും അദ്ദേഹം പറഞ്ഞു.
ഹെലികോപ്റ്ററിൽ ആരൊക്കെ സഞ്ചരിച്ചു, എന്തിന് വട്ടം ചുറ്റി എന്നതും പൊലീസ് അന്വേഷിക്കുന്നുണ്ട്.ഹെലികോപ്റ്റർ പറന്നതിൽ അസ്വാഭാവികത ഇല്ലെന്നാണ് പൊലീസിന്റെ പ്രാഥമിക വിലയിരുത്തലെന്നാണ് വിവരം.