തിരുവനന്തപുരം: സംസ്ഥാനത്ത് ഇന്ത്യൻ നിർമിത വിദേശമദ്യത്തിനും ബിയറിനും വൈനും വില വർധിപ്പിച്ചു. മദ്യനിര്മാണ കമ്പനികളുടെ ആവശ്യം കണക്കിലെടുത്താണ് തീരുമാനം.
ശരാശരി 10 ശതമാനം വരെയാണ് വിലവര്ധന. വിവിധ ബ്രാന്റുകള്ക്ക് 10 മുതല് 50 രൂപ വരെയാണ് വര്ധിക്കുക. തിങ്കളാഴ്ച മുതൽ വില വർധന പ്രാബല്യത്തിൽ വരും.
ബെവ്കോയുടെ നിയന്ത്രണത്തില് ഉത്പാദിപ്പിക്കുന്ന ജവാന് റമ്മിനും വില ഉയരും. ജവാന് 10 രൂപയാണ് ഉയരുക. 640 രൂപയുടെ മദ്യത്തിന് ഇനി 650 രൂപ നല്കണം. പുതുക്കിയ മദ്യ വില വിവര പട്ടിക ബെവ്കോ പുറത്തു വിട്ടിടുണ്ട്. ഇത് പ്രകാരം 62 കമ്പനികളുടെ 341 ബ്രാന്റുകള്ക്ക് വില വര്ധിക്കും. ചില ബ്രാന്ഡുകളുടെ വില വർധിക്കില്ല.
ബവ്കോയും മദ്യക്കമ്പനികളും തമ്മിലുള്ള 'റേറ്റ് കോണ്ട്രാക്ട്' അനുസരിച്ചാണു മദ്യവില നിശ്ചയിക്കുന്നത്. എല്ലാ വര്ഷവും വിലവര്ധന കമ്പനികള് ആവശ്യപ്പെടാറുണ്ടാറുണ്ട്. ചില വര്ഷങ്ങളില് ഇത് അനുവദിച്ചു നല്കാറുണ്ട്. നിലവില് കമ്പനികളുമായി നടത്തിയ ചര്ച്ചയ്ക്ക് ശേഷമാണ് വില വര്ധിപ്പിച്ചതെന്നാണ് ബെവ്കോ സിഎംഡി ഹര്ഷിത അട്ടല്ലൂരി പറഞ്ഞത്.
