കോട്ടയം: അയർക്കുന്നത്ത് നിയന്ത്രണം വിട്ട മിനിലോറി റോഡരികിലേയ്ക്ക് ഇടിച്ച് കയറി 3 പേർക്ക് പരുക്ക്. വൈക്കം തോട്ടകം നെടുംതറ പാർവതി (25), ആംബുലൻസ് ഡ്രൈവർ ആർപ്പൂക്കര പടിഞ്ഞാറേ പുല്ലത്ത് അമൽ സി ഷാജി (27), ശ്രീജിത്ത് എന്നിവർക്കാണ് പരുക്കേറ്റത്.
തിരുവഞ്ചൂർ അയർക്കുന്നം ചമയങ്കര ഭാഗത്തായിരുന്നു അപകടം. അപകടത്തിൽ പരിക്കേറ്റവരെ മോട്ടോർ വാഹന വകുപ്പ് ഉദ്യോഗസ്ഥരാണ് വാഹനത്തിൽ ആശുപത്രിയിൽ എത്തിച്ചത്. അപകടത്തിൽപ്പെട്ട ആരുടെയും നില ഗുരുതരമല്ല.
തമിഴ്നാട്ടിലേയ്ക്ക് പോകുകയായിരുന്ന മിനി ലോറി നിയന്ത്രണം നഷ്ടപ്പെട്ട് റോഡരികിലുള്ള കടയിലേയ്ക്ക് ഇടിച്ച് കയറുകയായിരുന്നു. ഈ സമയം ഇവിടെ നിന്നവർക്കാണ് പരുക്ക്. തുടർന്ന് ഇതുവഴി വാഹനത്തിലെത്തിയ മോട്ടോർ വാഹന വകുപ്പ് എൻഫോഴ്സ്മെന്റ് വിഭാഗം എം.വി.ഐ ആശാകുമാർ, എ.എം.വി.ഐമാരായ ജോർജ് വർഗീസ്, സജിത്ത് എന്നിവരുടെ നേതൃത്വത്തിൽ അപകടത്തിൽപ്പെട്ടവരെ കോട്ടയം കാരിത്താസ് ആശുപത്രിയിൽ എത്തിക്കുകയായിരുന്നു.
