തദ്ദേശ തെരഞ്ഞെടുപ്പ്; വോട്ടര്‍പട്ടിക പുതുക്കാനുള്ള അവസാന തീയതി ഓഗസ്റ്റ് 12 വരെ നീട്ടി
തിരുവനന്തപുരം: തദ്ദേശസ്ഥാപനങ്ങളിലേയ്ക്കുള്ള തെരഞ്ഞെടുപ്പിനു മുന്നോടിയായി വോട്ടര്‍പട്ടിക പുതുക്കുന്നതിനുള്ള അവസാനതീയതി ഓഗസ്റ്റ് 12 വരെ നീട്ടിയതായി സംസ്ഥാന തെരഞ്ഞെടുപ്പ് കമ്മീഷൻ.
ഇത് സംബന്ധിച്ച് ഉത്തരവിറക്കിയതായി തെരഞ്ഞെടുപ്പ് കമ്മിഷണർ എ. ഷാജഹാന്‍ അറിയിച്ചു. ഇതോടെ തദ്ദേശ സ്ഥാപനങ്ങൾക്ക് അടുത്ത ശനി, ഞായർ (ഓഗസ്റ്റ് 9, 10) ദിവസങ്ങളിൽ അവധി ഉണ്ടായിരിക്കില്ലെന്നും തെരഞ്ഞെടുപ്പ് കമ്മിഷൻ അറിയിച്ചു.
നേരത്തെ ഓഗസ്റ്റ് 8 വരെയായിരുന്നു വോട്ടർപട്ടിക പുതുക്കാനുള്ള സമയപരിധി. കൂടുതൽ ആളുകൾക്ക് വോട്ടർപട്ടികയിൽ പേര് ചേർക്കാനും നിലവിലെ വിവരങ്ങളിൽ മാറ്റങ്ങൾ വരുത്താനും അവസരം നൽകുന്നതിന് വേണ്ടിയാണ് സമയപരിധി നീട്ടിയത്. ഈ വർഷം അവസാനത്തോടെ സംസ്ഥാനത്ത് തദ്ദേശ തെരഞ്ഞെടുപ്പ് നടക്കാനിരിക്കെയാണ് തെരഞ്ഞെടുപ്പ് കമ്മിഷൻ വോട്ടർ പട്ടിക പുതുക്കുന്നത്.
