സന്നിധാനം: മണ്ഡല, മകരവിളക്ക് ഉത്സവത്തിന്‍റെ ഭാഗമായി നടത്തിയ സർവീസ് വഴി കെഎസ്ആർടിസിക്ക് ഇക്കുറി ലഭിച്ചത് 38.88 കോടി രൂപ. മണ്ഡലകാലം ആരംഭിച്ചത് മുതൽ പമ്പ- നിലയ്ക്കൽ റൂട്ടിൽ ആകെ 1,37,000 ചെയ്ൻ സർവീസുകളും 34,000 ദീർഘദൂര സർവീസുകളും നടത്തി. ആകെ 64.25 ലക്ഷം ആളുകളാണ് കെഎസ്ആർടിസി വഴി യാത്ര ചെയ്തത്.
ജനുവരി 15ന് മകരജ്യോതി ദർശനം കഴിഞ്ഞ് തിരിച്ചിറങ്ങിയ അയ്യപ്പഭക്തരെയും കൊണ്ട് വൈകിട്ട് 7 മുതൽ ജനുവരി 16ന് പുലർച്ചെ 3.30 മണി വരെ ഇടമുറിയാതെ പമ്പ -നിലയ്ക്കൽ റൂട്ടിൽ ചെയ്ൻ സർവീസുകൾ നടത്തിയിരുന്നു. ഒപ്പം ചെങ്ങന്നൂർ, കോട്ടയം, കുമിളി, തിരുവനന്തപുരം, തൃശൂർ തുടങ്ങിയ ഇടങ്ങളിലേക്ക് ദീർഘദൂര സർവീസുകളും നടത്തി.
ശബരിമല നട അടയ്ക്കുന്ന ഇന്നു രാത്രി വരെ ചെയ്ൻ സർവീസുകളും, നാളെ പുലർച്ചെ 4 മണി വരെ ദീർഘദൂര സർവീസുകളും ഉണ്ടായിരിക്കുമെന്ന് കെഎസ്ആർടിസി പമ്പ സ്പെഷ്യൽ ഓഫിസർ പറഞ്ഞു.
