കൊച്ചി: എറണാകുളം സൗത്ത് റെയിൽവേ മേൽപാലത്തിന് സമീപമുള്ള ആക്രി ഗോഡൗണിൽ വൻ തീപിടിത്തം. അർധരാത്രി 1 മണിയോടെയാണ് തീപിടിത്തമുണ്ടായത്. അപകടത്തിൽ സമീപത്തുള്ള വീടും, കടകളും, പാർക്കിങ് ഏരിയയിലെ വാഹനങ്ങളും കത്തി നശിച്ചു. അഗ്നിശമന സേനയും പൊലീസും ചേർന്ന് മണികൂറുകൾ സമയമെടുത്താണ് തീയണച്ചത്. ഗോഡൗണിലുണ്ടായിരുന്ന 9 തൊഴിലാളികളെ അഗ്നി ശമന സേന രക്ഷപ്പെടുത്തി.
സമീപത്തുള്ള വീട്ടുകാരെ പൊലീസ് ഒഴിപ്പിച്ചു. സൗത്ത് റെയിൽവേ പാലത്തിന് അടുത്തായതിനാൽ ട്രെയിൻ ഗതാഗതവും തടസപ്പെട്ടു.
രണ്ടു മണിക്കൂറിന് ശേഷമാണ് ട്രെയിൻ ഗതാഗതം പുനസ്ഥാപിച്ചത്. ഗോഡൗണിന്‍റെ പിൻവശത്ത് നിന്നാണ് തീ പടർന്നതെന്നും സംഭവത്തിൽ വിശദമായ അന്വേഷണം നടത്തുമെന്നും കൊച്ചി എസിപി രാജ്കുമാർ പറഞ്ഞു.
