തിരുവനന്തപുരം: ആരോഗ്യ രംഗത്ത് അഭിമാന നേട്ടങ്ങൾ കൈക്കൊള്ളാൻ കേരളത്തിനായത് ആരോഗ്യ പ്രവർത്തനകരുടെ പിന്തുണ കൊണ്ടാണെന്ന് സംസ്ഥാന ആരോഗ്യ മന്ത്രി വീണാ ജോർജ്. കോവളത്ത് നടക്കുന്ന ഐഎംഎ 98ാമത് ദേശീയ സമ്മേളനത്തിലെ തുടർ വിദ്യാഭ്യാസ പരിപാടി ഉദ്ഘാടനം ചെയ്യുകയാരുന്നു മന്ത്രി.
നിപ്പയും ആഗോളതലത്തിലുള്ള കൊവിഡ് വ്യാപനവും ഉണ്ടായപ്പോഴും കേരളം ലോകത്തിനു തന്നെ മികച്ച മാതൃകയായി. അതിന് സംസ്ഥാന സർക്കാരിനോടൊപ്പം നിന്ന ഐഎംഎ മികച്ച പിന്തുണയാണ് നൽകിയിരുന്നതെന്നും മന്ത്രി പറഞ്ഞു.
ചടങ്ങിൽ മാനെജ്മെന്‍റ് കോൺക്ലേവ് കടകംപള്ളി സുരേന്ദ്രൻ എംഎൽഎ ഉദ്ഘാടനം ചെയ്തു. ഐഎംഎ സംസ്ഥാന പ്രസിഡന്‍റ് ഡോ. ജോസഫ് ബനവൻ അധ്യക്ഷത വഹിച്ച ചടങ്ങിൽ ഓർഗനൈസിങ് കമ്മിറ്റി ചെയർമാൻ ഡോ. ശ്രീജിത് എൻ കുമാർ, സെക്രട്ടറി ഡോ. എൻ. സുൾഫി നൂഹു, കോ ചെയർമാൻ ഡോ. ജി.എസ്. വിജയകൃഷ്ണൻ, ജോ. സെക്രട്ടറി ഡോ. എ. അൽത്താഫ്, ഡോ. പി.വി. ബെന്നി തുടങ്ങിയവർ പങ്കെടുത്തു.
