എംഎൽഎമാരുടെ സത്യപ്രതിജ്ഞ വ്യാഴാഴ്ച

തിരുവനന്തപുരം: പുതുതായി തെരഞ്ഞെടുക്കപ്പെട്ട എംഎൽഎമാരുടെ സത്യപ്രതിജ്ഞ ഇന്നു രാവിലെ 9ന് നിയമസഭയിൽ നടക്കും. പ്രോ ടെം സ്പീക്കർ ജി. സുധാകരൻ സത്യവാചകം ചൊല്ലിക്കൊടുക്കും.

പ്രോ ടെം സ്പീക്കറായി മന്ത്രിസഭ നിയോഗിച്ച ജി. സുധാകരൻ ലോക്ഭവനിൽ നടന്ന ചടങ്ങിൽ എംഎൽഎയായി സത്യപ്രതിജ്ഞ ചെയ്തു. ജി. സുധാകരന് ഗവര്‍ണര്‍ രാജേന്ദ്ര വിശ്വനാഥ് അര്‍ലേക്കറാണ് സത്യവാചകം ചൊല്ലിക്കൊടുത്തത്. മുഖ്യമന്ത്രി വി.ഡി. സതീശനും ആഭ്യന്തര മന്ത്രി രമേശ് ചെന്നിത്തല അടക്കമുള്ള മറ്റു മന്ത്രിമാരും ചടങ്ങില്‍ പങ്കെടുത്തു.

നാളെയാണ് സ്പീക്കർ തെരഞ്ഞെടുപ്പ്. സ്പീക്കർ സ്ഥാനത്തേക്ക് തിരുവഞ്ചൂർ രാധാകൃഷ്ണനെയും ഡെപ്യൂട്ടി സ്പീക്കറായി ഷാനിമോൾ ഉസ്മാനെയും വിജയിപ്പിക്കാനാണ് യുഡിഎഫ് നീക്കം.

സ്ഥാനാർഥിയെ നിർത്തുന്ന കാര്യം എൽഡിഎഫ് തീരുമാനിച്ചിട്ടില്ല. 29നാണ് പുതിയ സർക്കാരിന്‍റെ നയപ്രഖ്യാപന പ്രസംഗം. തുടർന്നുള്ള ദിവസങ്ങളിൽ നയപ്രഖ്യാപനത്തിൽമേലുള്ള നന്ദിപ്രമേയ ചർച്ച നടക്കും.