പാലാരിവട്ടം പാലത്തിൽ തുള്ളിയവർ വർക്കലയിൽ മിണ്ടണ്ടേ?

സ്വന്തം ലേഖകൻ

തിരുവനന്തപുരം: പാലാരിവട്ടം മേൽപ്പാലത്തിന്‍റെ ബലക്ഷയവുമായി വർക്കലയിലെ ഫ്ളോട്ടിങ് ബ്രിഡ്ജ് തകർച്ചയെ താരതമ്യം ചെയ്യുകയാണ് പ്രതിപക്ഷ നേതാവ് വി.ഡി. സതീശൻ. പാലാരിവട്ടം പാലത്തിന്‍റെ പേരിൽ ബഹളമുണ്ടാക്കിയവർ വർക്കലയുടെ കാര്യത്തിൽ മറുപടി പറയണമെന്നാണ് അദ്ദേഹത്തിന്‍റെ ആവശ്യം. തെരഞ്ഞെടുപ്പ് അടുത്തിരിക്കെ സംഭവം വൻ രാഷ്‌ട്രീയ വിവാദമായി മാറിക്കഴിഞ്ഞു. ചാവക്കാട് ഫ്ളോട്ടിങ് ബ്രിഡ്ജ് തകർന്നു എന്നും, അതല്ല, അഴിച്ചുവച്ചതാണെന്നുമൊക്കെ വാദപ്രതിവാദങ്ങൾ ഉയർന്നതിനു പിന്നാലെയാണ് വർക്കലയിലെ സംഭവം.

വർക്കല പാപനാശം ബീച്ചിലെ ഫ്ലോട്ടിങ് ബ്രിജ് തകർന്ന് വിനോദ സഞ്ചാരികൾക്ക് അപകടമുണ്ടായ സംഭവത്തിൽ, സുരക്ഷാ ചുമതലയും നടത്തിപ്പും കരാർ കമ്പനിയുടെ ഉത്തരവാദിത്വമെന്ന ഡിടിപിസിയുടെ വാദം ടൂറിസം ഡയറക്‌ടർ തള്ളി. അപകടത്തില്‍ സുരക്ഷാ വീഴ്ചയുണ്ടായോ എന്ന് പരിശോധിക്കുമെന്നും ടൂറിസം ഡയറക്ടര്‍ പി.ബി. നൂഹ്.

പദ്ധതിയുടെ ചുമതല ഡിടിപിസിക്കും അഡ്വഞ്ചർ ടൂറിസം സൊസൈറ്റിക്കുമാണ്. കരാർ കമ്പനിക്ക് മാത്രമല്ല സുരക്ഷാ ചുമതലയുള്ളത്. സുരക്ഷാ വീഴ്ചയുണ്ടായിട്ടുണ്ടോ എന്ന് പരിശോധിക്കും. വേലിയേറ്റ മുന്നറിയിപ്പുകൾ അടക്കം അവഗണിച്ചോ എന്നും പരിശോധിക്കുമെന്നും ഡയറക്‌ർ പറഞ്ഞു. അന്വേഷണ റിപ്പോർട്ട് തിങ്കളാഴ്ച ടൂറിസം മന്ത്രി പി.എ. മുഹമ്മദ് റിയാസിന് സമർപ്പിക്കുമെന്നും അദ്ദേഹം പറഞ്ഞു.

സുരക്ഷാ ചുമതലയും നടത്തിപ്പും കരാർ കമ്പനിയുടെ ഉത്തരവാദിത്വമെന്നായിരുന്നു ഡിടിപിസിയുടേയും അഡ്വഞ്ചർ ടൂറിസം സൊസൈറ്റിയുടേയും വാദം. സംഭവത്തില്‍ റിപ്പോര്‍ട്ട് കിട്ടുന്നതിനനുസരിച്ച് നടപടിയെടുക്കുമെന്ന് ടൂറിസം വകുപ്പ് മന്ത്രി മുഹമ്മദ് റിയാസും വ്യക്തമാക്കി.

ശനിയാഴ്ച വൈകുന്നേരം വര്‍ക്കല ബീച്ചിലെ ഫ്ലോട്ടിങ് ബ്രിഡ്ജ് തകർന്ന് 15 പേര്‍ക്ക് പരുക്കറ്റിരുന്നു. രണ്ടുപേരുടെ നില ഗുരുതരമായി തുടരുകയാണ്.

ലോക്സഭാ തെരഞ്ഞെടുപ്പ് പടിവാതിലിൽ നിൽക്കേ ആറ്റിങ്ങൽ മണ്ഡലത്തിലുണ്ടായ അപകടത്തെ സർക്കാരിനെതിരെ ആയുധമാക്കുകയാണ് പ്രതിപക്ഷവും ബിജെപിയും.