മലപ്പുറം: പൊന്നാനി മാതൃശിശു ആശുപത്രിയിൽ ഗർഭിണിക്ക് രക്തം മാറി നൽകി. പാലപ്പെട്ടി സ്വദേശിനി റുക്സാനയ്ക്കാണ് ഒ നെഗറ്റീവ് രക്തത്തിന് പകരം ബി നെഗറ്റീവ് രക്തം നൽകിയതെന്നാണ് ആരോപണം. വിദഗ്ധ ചികിത്സയ്ക്കായി റുക്സാനയെ തൃശൂർ മെഡിക്കൽ കോളെജിലേക്ക് മാറ്റി.
ആരോഗ്യ പ്രശ്നങ്ങളോടെ പൊന്നാനി മാതൃശിശു ആശുപത്രിയിൽ എത്തിച്ച റുക്സാനയ്ക്ക് രക്തം നൽകാൻ തീരുമാനിക്കുകയായിരുന്നു. തുടർന്ന് രക്തം മാറിയാണ് നൽകിയതെന്ന് മനസിലായ ആശുപത്രി അധികൃതർ തൃശൂർ മെഡിക്കൽ കോളെജിലേക്ക് പോവാൻ നിർദേശിക്കുകയായിരുന്നു. നിലവിൽ തൃശൂർ മെഡിക്കൽ കോളെജിൽ തീവ്ര പരിചരണ വിഭാഗത്തിലാണ് റുക്സാന ഇപ്പോൾ. സംഭവത്തിനു പിന്നാലെ നാട്ടുകാരും ബന്ധുക്കളും പ്രതിഷേധവുമായി പൊന്നാനി മാതൃശിശു ആശുപത്രിക്ക് മുന്നിൽ പ്രതിഷേധവുമായി എത്തി.
