കൊച്ചി: "മെട്രൊ വാർത്ത' കൊച്ചി യൂണിറ്റിലെ ലേ ഔട്ട് ആർട്ടിസ്റ്റ് വിബിൻ ജോസ് (37) വാഹനാപകടത്തിൽ മരിച്ചു. എറണാകുളം ചെല്ലാനം ആറാട്ടുകുളങ്ങര വീട്ടിൽ പരേതനായ വിൽസണിന്‍റെയും ത്രേസ്യാമ്മയുടെയും മകനാണ്.
ഡ്യൂട്ടിയുടെ ഭാഗമായി വൈകിട്ട് ഓഫിസിലേക്കുള്ള യാത്രാമധ്യേ തോപ്പുപടി ബിഒടി പാലത്തിനു സമീപമായിരുന്നു അപകടം. പിന്നിൽ നിന്നു വന്ന ടോറസ് ലോറി വിബിൻ സഞ്ചിരിച്ച സ്കൂട്ടറിനു പിന്നിലിടിക്കുകയായിരുന്നു. തെറിച്ചുവീണ വിബിൻ തൽക്ഷണം മരിച്ചു.
മികച്ച കായികതാരമായിരുന്ന വിബിൻ ക്രിക്കറ്റിൽ പ്രാവീണ്യം നേടിയിരുന്നു. എറണാകുളം പ്രസ് ക്ലബിന്‍റെയും പ്രാദേശിക ടീമുകളുടെയും ടൂർണമെന്‍റുകളിൽ സജീവമായിരുന്നു. ബോട്ട് സവാരിയിലും പ്രാഗത്ഭ്യമുണ്ടായിരുന്ന വിബിൻ കടലിലെ മത്സ്യബന്ധനത്തിലും വിദഗ്ധനായിരുന്നു.
ഐലൻഡ് പൊലീസ് സ്ഥലത്തെത്തി മേൽ നടപടി സ്വീകരിച്ചു. മൃതദേഹം എറണാകുളം ജനറൽ ആശുപത്രിയിലെ മോർച്ചറിയിലേക്ക് മാറ്റി. ചൊവ്വാഴ്‌ച രാവിലെ പോസ്റ്റ് മോർട്ടത്തിനു ശേഷം മൃതദേഹം ബന്ധുക്കൾക്ക് വിട്ടുകൊടുക്കും. ഭാര്യ: എയ്ഞ്ചൽ. മക്കൾ: തിയോഫിൻ (3), ഗ്ലെൻ (1). സഹോദരി: വിജിത. സഹോദരീ ഭർത്താവ്: സിജോ.
