തിരുവനന്തപുരം: ന്യൂഡൽഹിയിലേക്ക് തിരുവനന്തപുരം അന്താരാഷ്‌ട്ര വിമാനത്താവളത്തിൽനിന്ന് എയർ ഇന്ത്യ പുതിയ സർവീസ് ആരംഭിച്ചു. ഈ സെക്റ്ററിലെ എയർ ഇന്ത്യയുടെ രണ്ടാമത്തെ പ്രതിദിന സർവീസാണ് ഇത്.
തിരുവനന്തപുരം- ഡൽഹി സർവീസ് (AI 829) രാവിലെ 06.40ന് പുറപ്പെട്ട് 09.25ന് എത്തിച്ചേരും. മടക്ക വിമാനം (AI 830) ഡൽഹിയിൽ നിന്ന് രാത്രി 9 മണിക്ക് പുറപ്പെട്ട് രാത്രി 12.20ന് തിരുവനന്തപുരത്തെത്തും. പൂർണമായും ഇക്കണോമി ക്ലാസ് സർവീസാണിത്. ഈ ഫ്ലൈറ്റിൽ 180 സീറ്റുകളുണ്ടാകും. രാവിലെ ഡൽഹിക്കു പോയി രാത്രി തിരിച്ചെത്താൻ സൗകര്യമുണ്ടെന്നതാണ് ഇതിന്‍റെ സവിശേഷത.
പുറമെ, ഈ വിമാനത്തിന്‍റെ സൗകര്യപ്രദമായ സമയം വിവിധ ആഭ്യന്തര പോയിന്‍റുകളിലേക്കും യൂറോപ്പ്, യുകെ, യുഎസ്, ഓസ്‌ട്രേലിയ, സൗത്ത് ഈസ്റ്റ് ഏഷ്യ എന്നിവയുൾപ്പെടെയുള്ള അന്താരാഷ്‌ട്ര ലക്ഷ്യസ്ഥാനങ്ങളിലേക്കും കണക്‌ഷൻ നൽകും. തിരുവനന്തപുരം- ഡൽഹി സെക്റ്ററിലെ നാലാമത്തെ പ്രതിദിന സർവീസാണിത്. ഇൻഡിഗോയും വിസ്താരയുമാണ് ഈ മേഖലയിൽ പ്രതിദിന സർവീസുകൾ നടത്തുന്ന മറ്റു കമ്പനികൾ.
