തിരുവനന്തപുരം: സ്തനാര്ബുദം ബാധിച്ചവരെ നേരത്തെ കണ്ടെത്തി ചികിത്സ ഉറപ്പാക്കുന്നതിന് കാന്സര് സെന്ററുകള്ക്കും പ്രധാന മെഡിക്കല് കോളെജുകള്ക്കും പുറമേ ജില്ലാ, താലൂക്ക് തല ആശുപത്രികളില് കൂടി മാമോഗ്രാം മെഷീനുകള് സ്ഥാപിക്കുമെന്ന് ആരോഗ്യ മന്ത്രി വീണാ ജോര്ജ്.
കെഎംഎസ് സിഎല് വഴി 2.4 കോടി രൂപ ചെലവഴിച്ച് 8 ആശുപത്രികളിലാണ് ആദ്യ ഘട്ടത്തില് മാമോഗ്രാം സ്ഥാപിക്കുന്നത്. ആലപ്പുഴ , കാസര്ഗോഡ്, കോഴിക്കോട് , പത്തനംതിട്ട , പാല ജനറല് ആശുപത്രികൾ, തിരൂര് ജില്ലാ ആശുപത്രി, അടിമാലി താലൂക്കാശുപത്രി, നല്ലൂര്നാട് ട്രൈബല് ആശുപത്രി എന്നിവിടങ്ങളിലാണ് മാമോഗ്രാം അനുവദിച്ചിട്ടുള്ളത്. ഇതില് 5 ആശുപത്രികളില് മാമോഗ്രാം മെഷീനുകള് എത്തി. ബാക്കിയുള്ള 3 ആശുപത്രികളില് കൂടി ഉടന് എത്തും. സമയബന്ധിതമായി മെഷീനുകള് ഇന്സ്റ്റാള് ചെയ്ത് പരിശോധനകള് ആരംഭിക്കുമെന്നും മന്ത്രി അറിയിച്ചു.
കാന്സര് പ്രതിരോധത്തിനും ചികിത്സയ്ക്കുമായി ആര്ദ്രം മിഷന്റെ ഭാഗമായി സമഗ്ര കാന്സര് കെയര് പദ്ധതി ആവിഷ്ക്കരിച്ച് നടപ്പിലാക്കി വരുന്നു. കാന്സര് പ്രാരംഭ ഘട്ടത്തില് കണ്ടെത്തി ചികിത്സ ഉറപ്പാക്കാനായി ആര്ദ്രം ജീവിതശൈലി രോഗനിര്ണയ സ്ക്രീനിംഗിന്റെ ഭാഗമായി 30 വയസിന് മുകളിലുള്ളവരെ ആരോഗ്യ പ്രവര്ത്തകര് വീട്ടിലെത്തി സ്ക്രീന് ചെയ്തു വരുന്നു. ആകെ 1.53 കോടിയിലധികം പേരെ സ്ക്രീന് ചെയ്തതില് 7.9 ലക്ഷത്തിലധികം പേര്ക്കാണ് സ്തനാര്ബുദ സാധ്യത കണ്ടെത്തിയത്. ഇവരെ വിദഗ്ധ പരിശോധനയ്ക്ക് വിധേയമാക്കി രോഗം സ്ഥിരീകരിച്ചവര്ക്ക് ചികിത്സ ഉറപ്പാക്കുന്നു. ഈ പരിശോധനയിലും ഏറ്റവുമധികം കണ്ടെത്തിയ കാന്സര് സ്തനാര്ബുദമാണ്. അതിനാല് തന്നെ സ്തനാര്ബുദ പ്രതിരോധത്തിനും ചികിത്സയ്ക്കും ആരോഗ്യ വകുപ്പ് പ്രത്യേക പ്രാധാന്യം നല്കുന്നുവെന്ന് മന്ത്രി വിശദീകരിച്ചു.
ബോക്സ്- മാമോഗ്രാം സ്തന എക്സ്-റേ പരിശോധന
സ്തനാര്ബുദം തുടക്കത്തില് തന്നെ കണ്ടെത്താന് സഹായിക്കുന്നതാണ് മാമോഗ്രാം. ഇതൊരു സ്തന എക്സ്-റേ പരിശോധനയാണ്. മാമോഗ്രാം പരിശോധനയിലൂടെ രോഗം നേരത്തെ കണ്ടെത്തി ചികിത്സിക്കാന് സാധിക്കുന്നതിനാല് രോഗം സങ്കീര്ണമാകാതിരിക്കാനും മരണനിരക്ക് വളരെയേറെ കുറയ്ക്കാനും സാധിക്കും. സ്തനത്തിന്റെ വലുപ്പം, ആകൃതി, നിറം, മുലക്കണ്ണ് എന്നിവയിലുളള മാറ്റം, സ്തനത്തില് കാണുന്ന മുഴ തുടങ്ങിയ രോഗലക്ഷണങ്ങള് കണ്ടാല് ഡോക്റ്ററെ കണ്ട് സ്തനാര്ബുദമല്ലെന്ന് ഉറപ്പാക്കണം.
