തിരുവനന്തപുരം: ജസ്റ്റിസ് ഹേമ കമ്മിറ്റി റിപ്പോര്ട്ടുമായി ബന്ധപ്പെട്ട് മൊഴി നല്കിയ ഏതെങ്കിലും വനിത പരാതി നല്കാന് തയാറായി മുന്നോട്ടു വന്നാല് സര്ക്കാരില് നിന്ന് ഉചിതമായ ഇടപെടലുണ്ടാകുമെന്ന് മുഖ്യമന്ത്രി പിണറായി വിജയന്.
"കുറ്റം ചെയ്തിട്ടുണ്ടെങ്കില് എത്ര ഉന്നതനായാലും നിയമത്തിനു മുന്നിലെത്തിക്കും. അതില് ഒരു തരത്തിലുള്ള സംശയവും ആര്ക്കും വേണ്ടതില്ല.'-മുഖ്യമന്ത്രി വാര്ത്താ സമ്മേളനത്തില് വ്യക്തമാക്കി. ഈ റിപ്പോര്ട്ട് എന്തുകൊണ്ട് നാലര വര്ഷം പൂഴ്ത്തി എന്ന ചോദ്യത്തിന് "ഒരു പൂഴ്ത്തലും ഉണ്ടായിട്ടില്ല'എന്നായിരുന്നു മറുപടി.
ഹേമ കമ്മറ്റി റിപ്പോര്ട്ടില് പലരുടെയും സ്വകാര്യതയെ ബാധിക്കുന്ന പരാമര്ശങ്ങള് ഉള്ളതിനാല് പുറത്ത് വിടാന് പാടില്ല എന്ന് ആവശ്യപ്പെട്ട് കൊണ്ട് ജസ്റ്റിസ് ഹേമ തന്നെ സര്ക്കാരിന് 2020 ഫെബ്രുവരി 19ന് കത്ത് നല്കിയിരുന്നു. കമ്മറ്റി മുന്പാകെ സിനിമാ മേഖലയിലെ ചില വനിതകള് നടത്തിയത് തികച്ചും രഹസ്യാത്മകമായ വെളിപ്പെടുത്തലുകള് ആണ്. ആയതിനാല് യാതൊരു കാരണവശാലും താന് അടങ്ങുന്ന കമ്മറ്റി തയ്യാറാക്കിയ റിപ്പോര്ട്ട് പുറത്ത് വിടാന് പാടില്ല എന്ന് ജസ്റ്റിസ് ഹേമ കത്തില് ആവര്ത്തിച്ച് ആവശ്യപ്പെട്ടു. വ്യക്തികളുടെ സ്വകാര്യത ലംഘിക്കുന്ന വിവരങ്ങള് പങ്കിടാന് കഴിയാത്ത സാഹചര്യത്തില് വിവരാവകാശ നിയമ പ്രകാരം ഹേമ കമ്മിറ്റി റിപ്പോര്ട്ടിന്റെ പകര്പ്പ് ആവശ്യപ്പെട്ട് വന്ന അപേക്ഷകള് സാംസ്കാരിക വകുപ്പിന്റെ മുഖ്യവിവരാവകാശ ഓഫീസര് നിരസിച്ചു. അതിനെതിരെ റിപ്പോര്ട്ട് പുറത്ത് വിടണമെന്ന് ആവശ്യപ്പെട്ട് ഒരു മാധ്യമപ്രവര്ത്തകന് 2020 ല് തന്നെ വിവരാവകാശ കമ്മീഷനെ സമീപ്പിച്ചിരുന്നു. റിപ്പോര്ട്ടില് വ്യക്തികളുടെ സ്വകാര്യതയെ ബാധിക്കുന്ന പരാമര്ശങ്ങള് ഉള്ളതിനാല് വിവരാവകാശ നിയമപ്രകാരം റിപ്പോര്ട്ട് പുറത്ത് വിടാന് കഴിയില്ലെന്ന് 2020 ഒക്ടോബര് 22 ന് കമ്മീഷന് ചെയര്മാന് വിന്സണ് എം പോള് ഉത്തരവിട്ടതായി മുഖ്യമന്ത്രി ചൂണ്ടിക്കാട്ടി.
സിനിമയില് നിന്നുള്ള നിരവധി വ്യക്തികള് കമ്മിറ്റിക്ക് മുമ്പാകെ ഉന്നയിച്ച വിവിധ ആരോപണങ്ങളുടെ സെന്സിറ്റീവ് സ്വഭാവവും അവ പരസ്യമായാല് അവര് അഭിമുഖീകരിക്കേണ്ടി വന്നേക്കാവുന്ന പ്രത്യാഘാതങ്ങളും കണക്കിലെടുത്ത് സാക്ഷികളുടെ മൊഴികള്ക്ക് പരിപൂര്ണമായും രഹസ്യാത്മകത ഉറപ്പുവരുത്താന് കമ്മിറ്റി ശ്രമിച്ചതായും റിപ്പോര്ട്ടില് ചൂണ്ടിക്കാണിച്ചിട്ടുണ്ട്. ഇതൊക്കെ വസ്തുതയായിരിക്കെ, സര്ക്കാര് പൂഴ്ത്തിവെച്ചു എന്ന് പറയുന്നതില് എന്താണര്ത്ഥം. സര്ക്കാരിന് ചെയ്യാന് കഴിയുന്ന എല്ലാ കാര്യങ്ങളും ചെയ്തിട്ടുണ്ട്. ഇനിയും ചെയ്യും. ചലച്ചിത്ര മേഖലയിലെ എല്ലാത്തരം നിയമ വിരുദ്ധ - സ്ത്രീ വിരുദ്ധ പ്രവണതകളെയും ശക്തമായി തന്നെ നേരിടും. അതിനുള്ള നിശ്ചയ ദാര്ഢ്യം തെളിയിച്ച സര്ക്കാരാണ് തന്റേതെന്ന് മുഖ്യമന്ത്രി ഓര്മിപ്പിച്ചു.
നടി ആക്രമിക്കപ്പെട്ട സംഭവം ഉള്പ്പെടെ ചലച്ചിത്ര രംഗത്തു ഉയര്ന്ന ഒരു വിഷയവും നിയമ നടപടി ഇല്ലാതെ പോയിട്ടില്ല. പീഡന പരാതികളില് നടിമാര് നല്കുന്ന പരാതികളില് കേസെടുത്ത് അന്വേഷണം നടത്താന് പൊലീസ് ഒരു ഘട്ടത്തിലും വിട്ടുവീഴ്ച ചെയ്തിട്ടില്ല. സിനിമയില് അവസരം നല്കാം എന്ന് വാഗ്ദാനം ചെയ്ത് ഒരു സംവിധായകന് പീഡിപ്പിച്ചു എന്ന് ഒരു സ്ത്രീ കഴിഞ്ഞ വര്ഷം പരാതി നല്കി. ഉടനടി കേസെടുത്ത് അന്വേഷണം ആരംഭിച്ചു. സിനിമയില് അഭിനയിപ്പിക്കാം എന്ന് വാഗ്ദാനംചെയ്ത് പീഡനം നടത്തിയ പ്രമുഖ നടനെതിരെ കേസെടുത്തു. നടിയോട് ലൈംഗിക താല്പ്പര്യത്തോടെ സമ്മര്ദ്ദം ചെലുത്തിയ മറ്റൊരു നടനെതിരെയും കേസെടുത്തു. പോക്സോ കേസില് മറ്റൊരു നടനെതിരെയും,പീഡന പരാതിയില് മറ്റൊരു സംവിധായകനെതിരെയും കേസെടുത്തത് സമീപ കാലത്താണെന്നും മുഖ്യമന്ത്രി പറഞ്ഞു.
സിനിമക്കുള്ളിലെ സാമ്പത്തിക വഞ്ചന, പകര്പ്പവകാശ ലംഘനം സൈബര് അധിക്ഷേപം തുടങ്ങിയ പല വിധ പരാതികളില് കേരളത്തിന്റെ വിവിധ ഭാഗങ്ങളില് പൊലീസ് കേസുകള് രജിസ്റ്റര് ചെയ്തു. പ്രശസ്ത ഡബ്ബിങ് ആര്ട്ടിസ്റ്റ് നല്കിയ പരാതിയില് പഴയൊരു സംവിധാകനെതിരെ ഐടി ആക്റ്റ് പ്രകാരവും, ജീവന് ഭീഷണി ഉണ്ടെന്ന് കാട്ടി പ്രമുഖയായ നടി നല്കിയ പരാതിയില് പ്രസിദ്ധനായ മറ്റൊരു പരസ്യ സംവിധായനെതിരെയും കേസെടുത്തു. നടിയെ ഫോണിലൂടെ തുടര്ച്ചയായി ശല്യം ചെയ്ത സംഭവത്തില് വേറൊരു സംവിധായനെതിരെ കേസെടുത്തു. ഇങ്ങനെ പരാതി ലഭിച്ച എല്ലാകേസിലും മുഖം നോക്കാതെയുള്ള നടപടിയാണ് പൊലീസ് സ്വീകരിച്ചിട്ടുള്ളതെന്ന് മുഖ്യമന്ത്രി അറിയിച്ചു.
