കെസിഎല്‍ കളിക്കാൻ ആറ് പത്തനംതിട്ടക്കാർ

പത്തനംതിട്ട: കേരള ക്രിക്കറ്റ് ലീഗിന്‍റെ രണ്ടാം പതിപ്പില്‍ പത്തനംതിട്ടയില്‍ നിന്നുള്ള ആറ് താരങ്ങള്‍ വിവിധ ടീമുകള്‍ക്കായി കളത്തിലിറങ്ങും. കേരള ടീമിലെ സ്ഥിരം സാന്നിധ്യവും ഐപിഎല്‍ താരവുമായ വിഷ്ണു വിനോദ് തന്നെ ഇതിൽ ഏറ്റവും പ്രമുഖൻ. എസ്. സുബിന്‍, ആല്‍ഫി ഫ്രാന്‍സിസ്, കെ.ജെ. രാകേഷ്, മോനു കൃഷ്ണ, ഷൈന്‍ ജോണ്‍ ജേക്കബ് എന്നിവരാണ് ഇത്തവണ ഗ്രീന്‍ഫീല്‍ഡ് സ്റ്റേഡിയത്തില്‍ കളിക്കാനിറങ്ങുന്ന ജില്ലയില്‍ നിന്നുള്ള മറ്റ് അഞ്ച് പേർ.

സഞ്ജു സാംസണ്‍ കഴിഞ്ഞാല്‍ ഇത്തവണ ഏറ്റവും കൂടുതല്‍ പ്രതിഫലം നേടുന്ന താരങ്ങളില്‍ ഒരാളാണ് വിഷ്ണു വിനോദ്. ഏരീസ് കൊല്ലം സെയിലേഴ്‌സ് 12.80 ലക്ഷം രൂപയ്ക്കാണ് വിഷ്ണുവിനെ സ്വന്തമാക്കിയത്. ഒറ്റയ്ക്ക് കളിയുടെ ഗതി തിരിക്കാന്‍ കെൽപ്പുള്ള വിഷ്ണുവിനായി വലിയ മത്സരമായിരുന്നു ലേലത്തിൽ. ഐപിഎല്ലില്‍ റോയൽ ചലഞ്ചേഴ്സ് ബംഗളൂരു, ഡല്‍ഹി ക്യാപ്പിറ്റൽസ്, സൺറൈസേഴ്സ് ഹൈദരാബാദ്, മുംബൈ ഇന്ത്യൻസ്, പഞ്ചാബ് കിങ്സ് ടീമുകളുടെ ഭാഗമായിരുന്നു വിഷ്ണു. വിക്കറ്റ് കീപ്പറും ഏതു പൊസിഷനിലും ഇറങ്ങാൻ കഴിയുന്ന വെടിക്കെട്ട് ബാറ്ററുമാണ്.

ഇത്തവണ ലേലത്തിന് ലിസ്റ്റ് ചെയ്യപ്പെട്ടവരില്‍ ഏറ്റവും പ്രായം കൂടിയ താരമായിരുന്നു കെ.ജെ. രാകേഷ്. കേരള ടീമംഗവും പിന്നീട് സെലക്റ്ററുമായിരുന്ന രാകേഷ് കളിയോടുള്ള അടങ്ങാത്ത ആവേശവുമായാണ് 42ാം വയസിലും ലീഗിന്‍റെ ഭാഗമാകുന്നത്. അവസരങ്ങള്‍ക്ക് പ്രായമൊരു തടസമല്ലെന്നു തെളിയിക്കുകയാണ് രാകേഷ്. 75,000 രൂപയ്ക്ക് കൊച്ചി ബ്ലൂ ടൈഗേഴ്‌സാണ് രാകേഷിനെ ടീമിലെടുത്തത്.

എസ്. സുബിനാണ് പത്തനംതിട്ടയിൽ നിന്ന് കെസിഎല്‍ കളിക്കുന്ന മറ്റൊരു താരം. സംസ്ഥാന ക്രിക്കറ്റ് വൃത്തങ്ങളിൽ വെടിക്കെട്ട് ബാറ്ററായി അറിയപ്പെടുന്ന താരം. ഒന്നര ലക്ഷം രൂപയ്ക്ക് അദാനി ട്രിവാൻഡ്രം റോയല്‍സ് നിലനിര്‍ത്തുകയായിരുന്നു. കഴിഞ്ഞ പ്രസിഡന്‍റ്സ് കപ്പിലെയും എന്‍എസ്‌കെ ട്രോഫിയിലെയും മികച്ച പ്രകടനമാണ് സുബിന് രണ്ടാം സീസണിലും കെസിഎല്ലിലേക്ക് വഴി തുറന്നത്.

കഴിഞ്ഞ തവണയും കെസിഎല്‍ കളിച്ചവരാണ് ഷൈന്‍ ജോണ്‍ ജേക്കബും മോനു കൃഷ്ണയും. മോനു കൃഷ്ണ തൃശൂരിനായി 11 വിക്കറ്റുകള്‍ വീഴ്ത്തിയപ്പോള്‍ ഷൈന്‍ കൊച്ചിയ്ക്കായി 10 വിക്കറ്റുകള്‍ നേടിയിരുന്നു. ഈ മികവാണ് ഇത്തവണയും ഇവര്‍ക്ക് അവസരങ്ങള്‍ തുറന്നത്. കാലിക്കറ്റ് ഗ്ലോബ് സ്റ്റാര്‍സാണ് ഇത്തവണ ഇരുവരെയും സ്വന്തമാക്കിയത്. മോനു കൃഷ്ണയെ 2.10 ലക്ഷത്തിലും ഷൈന്‍ ജോണ്‍ ജേക്കബിനെ ഒന്നര ലക്ഷത്തിലുമാണ് ഗ്ലോബ് സ്റ്റാര്‍സ് ടീമിലെടുത്തത്. 2.20 ലക്ഷത്തിന് കൊച്ചി സ്വന്തമാക്കിയ ആല്‍ഫി ഫ്രാന്‍സിസാണ് ലീഗില്‍ പത്തനംതിട്ടയുടെ മറ്റൊരു സാന്നിധ്യം.