വണ്ടിപ്പെരിയാറിൽ കടുവയെ പിടികൂടാൻ സ്ഥാപിച്ച കൂട്ടിൽ പുലി കുടുങ്ങി
വണ്ടിപ്പെരിയാർ: ഇടുക്കി വണ്ടിപ്പെരിയാർ അരണക്കൽ ഗ്രാമ്പിയിൽ പ്രദേശവാസികളെ ഭീതിയിലാഴ്ത്തിയ കടുവയെ പിടികൂടാൻ സ്ഥാപിച്ച കൂട്ടിൽ പുലി കുടുങ്ങി. പെരിയാര്‍ കടുവ സങ്കേതത്തില്‍ നിന്നും എത്തിയ കടുവയെ പിടികൂടാനാണ് ഇവിടെ കൂട് സ്ഥാപിച്ചത്.
പുലിയെ പെരിയാര്‍ കടുവ സങ്കേതത്തില്‍ തുറന്നു വിടും. അഞ്ച് വയസുള്ള ആണ്‍ പുലിയാണ് കൂട്ടില്‍ കുടുങ്ങിയത്. കഴിഞ്ഞ കുറച്ച് ദിവസങ്ങളായി ഗ്രാമ്പിയിലുള്ള വണ്ടിപ്പെരിയാര്‍ പഞ്ചായത്തംഗത്തിന്‍റെ വളര്‍ത്തു മൃഗത്തെ കടുവ ആക്രമിച്ചിരുന്നു.
മൂന്നാറിലെ ജനവാസ മേഖലയില്‍ നിന്ന് പിടികൂടി പെരിയാര്‍ കടുവ സങ്കേതത്തില്‍ വിട്ട കടുവയാണ് വണ്ടിപ്പെരിയാറിലെത്തിയത്. ഇതിനെ പിടികൂടാനായാണ് വനം വകുപ്പ് കൂടു സ്ഥാപിച്ചത്. കടുവിയെ ഇതുവരെ പിടികൂടാനായിട്ടില്ല.