വഡോദരയിൽ പാലം തകർന്നുണ്ടായ അപകടം; 4 എൻജിനീയർമാർക്ക് സസ്പെൻഷൻ
ഗാന്ധിനഗർ: ഗുജറാത്തിലെ വഡോദരയിൽ പാലം തകർന്നുണ്ടായ അപകടത്തെത്തുടർന്ന് നിരവധി പേർ മരിച്ച സംഭവത്തിൽ 4 എൻജിനീയർമാരെ സസ്പെൻഡ് ചെയ്തു. വഡോദര ഡിവിഷൻ എക്സിക‍്യൂട്ടിവ് എൻജിനീയർ എൻ.എം. നായകവാല, ഡെപ‍്യൂട്ടി എക്സിക‍്യൂട്ടിവ് എൻജിനീയർ യു.സി. പട്ടേൽ, ആർ.ടി. പട്ടേൽ, അസിസ്റ്റന്‍റ് എൻജിനീയർ ജെ.വി. ഷാ എന്നിവരെയാണ് സസ്പെൻഡ് ചെയ്തത്.
ഗുജറാത്ത് മുഖ‍്യമന്ത്രി ഭൂപേന്ദ്ര പട്ടേലിന്‍റെയാണ് നടപടി. അപകടത്തെ പറ്റി വിലയിരുത്തിയ കമ്മിറ്റിയുടെ നിർദേശ പ്രകാരമാണ് റോഡ്സ് ആൻഡ് ബിൽഡിങ് വകുപ്പിലെ നാല് എൻജിനീയർമാരെ സസ്പെൻഡ് ചെയ്തത്.
ഇതു കൂടാതെ സംസ്ഥാനത്തെ പാലത്തിന്‍റെ സുരക്ഷാ പരിശോധനയ്ക്കും മുഖ‍്യമന്ത്രി നിർദേശം നൽകി. വഡോദരയിലെ പദ്ര മുജ്പൂരിനടുത്തായിരുന്നു ബുധനാഴ്ച പാലം തകർന്ന് അപകടമുണ്ടായത്. അപകടത്തിൽ 17 പേർ മരിക്കുകയും 8 പേർക്ക് പരുക്കേൽക്കുകയും ചെയ്തിരുന്നു.
