ഇന്ത്യയില്‍ കളിക്കാന്‍ ക്രിസ്റ്റ്യാനോ റൊണാള്‍ഡോ എത്തുന്നു!!
ന്യൂഡൽഹി: സൂപ്പര്‍ താരം ക്രിസ്റ്റ്യാനോ റൊണാള്‍ഡോ ഇന്ത്യയിലേത്തുമെന്ന് റിപ്പോർട്ട്. എഎഫ്സി ചാമ്പ്യന്‍സ് ലീഗ് ഫുട്‌ബോളില്‍ കളിക്കാനാണ് റൊണാള്‍ഡോ ഇന്ത്യയിലെത്തുക. സെപ്റ്റംബര്‍ 16 മുതല്‍ ഡിസംബര്‍ 10 വരെയാണ് മത്സരങ്ങള്‍ നിശ്ചയിച്ചിട്ടുള്ളത്.
അര്‍ജന്‍റീന നായകന്‍ ലിയോണല്‍ മെസി ഈ വര്‍ഷം കേരളത്തിലെത്തുന്നത് സംബന്ധിച്ചുള്ള വിവാദങ്ങള്‍ക്കിടെയാണ് ഫുട്ബോളിലെ തന്നെ മറ്റൊരു സൂപ്പര്‍ താരമായ ഇന്ത്യയില്‍ കളിക്കാന്‍ എത്തുന്നത്.
ഓഗസ്റ്റ് 16ന് മലേഷ്യയിലെ ക്വലാലംപുരില്‍ എഎഫ്സി ചാമ്പ്യന്‍സ് ലീഗ് ഗ്രൂപ്പ് രണ്ട് നറുക്കെടുപ്പില്‍ റൊണാള്‍ഡോയുടെ ക്ലബായ സൗദിയിലെ അല്‍ നസ്റും എഫ്‌സി ഗോവയും ഒരേ ഗ്രൂപ്പില്‍ ഉള്‍പ്പെട്ടു. ഇതോടെയാണ് ക്രിസ്റ്റ്യാനോ റൊണാള്‍ഡോയ്ക്ക് ഇന്ത്യയിലേക്കുള്ള വഴിയൊരുങ്ങിയത്.
ചാമ്പ്യന്‍സ് ലീഗിലെ പശ്ചിമമേഖലയിലെ 16 ടീമുകളെ 4 ഗ്രൂപ്പുകളായി തിരിച്ചാണ് മത്സരം. ഇതില്‍ പോട്ട് ഒന്നിലായിരുന്നു സൗദി ക്ലബ് അല്‍ നസ്ര്‍, പോട്ട് മൂന്നില്‍ ബഗാനും നാലില്‍ ഗോവയും ഉൾപ്പെട്ടു. ഹോം ആന്‍ഡ് എവേ അടിസ്ഥാനത്തിൽ ടൂര്‍ണമെന്‍റുകൾ നടക്കുന്നതിനാൽ തന്നെ എഫ്‌സി ഗോവയ്‌ക്കെതിരേ ഇന്ത്യയില്‍ കളിക്കാന്‍ റൊണാള്‍ഡോ എത്തിയേക്കും.
