ന്യൂഡൽഹി: അതിർത്തിക്കപ്പുറത്തു നിന്ന് ആയുധങ്ങളും സ്ഫോടകവസ്തുക്കളും കടത്തുന്ന സംഘത്തിന്‍റെ തലവനെ ദേശീയ അന്വേഷണ ഏജൻസി (എൻഐഎ) മിസോറാമിൽ നിന്ന് അറസ്റ്റ് ചെയ്തു. മിസോറാമിലെ മമിത് സ്വദേശി ലാലൻഗൈഹോമയെയാണ് ഐസ്‌വാളിൽ നിന്നു പിടികൂടിയത്. വടക്കുകിഴക്കവൻ സംസ്ഥാനങ്ങളിലെ രാജ്യവിരുദ്ധ സംഘടനകൾക്കും ഗൂണ്ടാസംഘങ്ങൾക്കും ആയുധമെത്തിച്ചിരുന്ന പ്രധാന കണ്ണിയാണ് ഇയാൾ.
കഴിഞ്ഞ ഡിസംബർ 26ന് ഇതുസംബന്ധിച്ച് എൻഐഎ കേസെടുത്തിരുന്നു. ലാലൻഗൈഹോമ മറ്റു നിരവധി പേരുമായി ചേർന്നാണ് ആയുധ- സ്ഫോടകവസ്തു കള്ളക്കടത്ത് നടത്തിയിരുന്നതെന്ന് എൻഐഎ വക്താവ്. മേഖലയിൽ ഭീകരാക്രമണങ്ങൾക്കും ക്രിമിനൽ പ്രവൃത്തികൾക്കും പ്രധാന പിന്തുണ ഇവരിൽ നിന്നാണെന്നും എൻഐഎ.
