കുനോ ദേശീയോദ്യാനത്തിൽ അഞ്ചു ചീറ്റകൾ കൂടി പിറന്നു

ശ്യോപുർ: മധ്യപ്രദേശിലെ കുനോ ദേശീയോദ്യാനത്തിൽ അഞ്ചു ചീറ്റക്കുട്ടികൾ കൂടി പിറന്നു. നമീബിയയിൽ നിന്ന് ഇന്ത്യയിലെത്തിച്ച ആശ എന്ന ചീറ്റയാണ് കഴിഞ്ഞ ദിവസം പ്രസവിച്ചത്. ഇതോടെ, കുനോ വനത്തിലെ ചീറ്റകളുടെ എണ്ണം 35 ആയി ഉയർന്നു. ഇതിൽ 24 ചീറ്റകളും ഇന്ത്യയിൽ ജനിച്ചവയാണ്.

പുതിയ അതിഥികളുടെ വരവ് മധ്യപ്രദേശ് മുഖ്യമന്ത്രി മോഹൻ യാദവാണ് സമൂഹമാധ്യമത്തിൽ പങ്കുവച്ചത്. മധ്യപ്രദേശ് വനംവകുപ്പ് ഉദ്യോഗസ്ഥരുടെയും ജീവനക്കാരുടെയും സമർപ്പണത്തോടെയുള്ള പരിപാലനമാണു ചീറ്റ പുനരധിവാസത്തിന് പിൻബലമെന്നും അദ്ദേഹം.