പുൽവാമയിൽ കശ്മീരി പണ്ഡിറ്റിനെ ഭീകരർ വെടിവച്ചു കൊന്നു

പുൽവാമ : പുൽവാമയിൽ കശ്മീരി പണ്ഡിറ്റിനെ വെടിവച്ചു കൊന്നു. നാൽപതുകാരനായ സഞ്ജയ് ശർമ്മയാണു കൊല്ലപ്പെട്ടത്. പുൽവാമ അചാൻ പ്രദേശവാസിയായ ഇദ്ദേഹം ബാങ്ക് സെക്യൂരിറ്റി ഗാർഡായി ജോലി ചെയ്യുന്നയാളാണ്. രാവിലെ പതിനൊന്നു മണിയോടെയാണ് ‌ഭീകരർ ഇദ്ദേഹത്തിനു നേരെ നിറയൊഴിച്ചത്.

ചന്തയിലേക്കു പോകുന്ന വഴിയിലാണു സഞ്ജയ് ശർമ്മയ്ക്കു വെടിയേറ്റതെന്നു ജമ്മു കശ്മീർ പൊലീസ് വ്യക്തമാക്കി. ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭീകരർക്കായി അന്വേഷണം ആരംഭിച്ചതായി പൊലീസ് അറിയിച്ചു.

കഴിഞ്ഞ ഒരു വർഷത്തിനിടെ ജമ്മു കശ്മീരിൽ മൂന്നോളം കശ്മീരി പണ്ഡിറ്റുകൾ ഭീകരരുടെ ആക്രമണത്തിൽ കൊല്ലപ്പെട്ടിട്ടുണ്ട്.