ചിക്കമംഗളൂരു: മലയാളിയായ ജിഷ ഉൾപ്പടെ കർണാടകയിൽ ആറ് നക്സലൈറ്റുകൾ ചിക്കമംഗളൂരു ജില്ലാ ഭരണകൂടത്തിന് മുന്നിൽ ആയുധം വച്ചു കീഴടങ്ങി. നക്സലൈറ്റുകൾ ആയുധം താഴെ വെച്ചതോടെ കർണാടകയിൽ ഏറ്റവും വലിയ നക്സൽ കീഴടങ്ങൽ രേഖപ്പെടുത്തി. കർണാടകയിലെ ചിക്കമംഗളൂരു ജില്ലയിൽ മോസ്റ്റ് വാണ്ടഡ് ആയ ആറ് നക്സലുകളാണ് പോലീസിൽ കീഴടങ്ങിയത്. ഒന്നിലധികം സംസ്ഥാനങ്ങളിൽ ക്രിമിനൽ കുറ്റങ്ങൾ നേരിടുന്ന ഈ നക്സലുകൾ കീഴടങ്ങിയത് സംസ്ഥാന ചരിത്രത്തിലെ ഏറ്റവും വലിയ സംഭവമാണ്.
കർണാടക സ്വദേശികളായ മുണ്ടഗാരു ലത, സുന്ദരി, ജയണ്ണ, വനജാക്ഷി കേരളത്തിൽ നിന്നുള്ള ജിഷ, തമിഴ്‌നാട് സ്വദേശി കെ. വസന്ത് എന്ന രമേഷ് എന്നിവരാണ് കീഴടങ്ങിയവർ. ലതയ്‌ക്കെതിരെ 85, സുന്ദരിക്കെതിരെ 71, ജയണ്ണയ്‌ക്കെതിരെ 50 എന്നിങ്ങനെ നിരവധി ക്രിമിനൽ കേസുകളാണ് നിലവിലുള്ളത്.
നക്സൽ പ്രസ്ഥാനത്തിലെ പ്രമുഖരിൽ ഒരാളായി അറിയപ്പെടുന്ന ലതയ്‌ക്കെതിരെ ഒന്നിലധികം സംസ്ഥാനങ്ങളിൽ കേസുകൾ രജിസ്റ്റർ ചെയ്തിട്ടുണ്ട്. തമിഴ്‌നാട്ടിൽ നിന്നുള്ള വസന്തിനെതിരേ എട്ട് കേസുകളും കേരളത്തിൽ നിന്നുള്ള ജിഷയ്‌ക്കെതിരേ 17 കേസുകളും ഉണ്ട്. ആറ് പേർക്കും ദേശീയ അന്വേഷണ ഏജൻസി(എൻഐഎ)യാണ് കുറ്റം ചുമത്തിയിരിക്കുന്നത്. കീഴടങ്ങലിന് ശേഷം അവരെ ചോദ്യം ചെയ്യും.
ചിക്കമംഗളൂരു എസ്പി വിക്രം ആംതെയുടെ മേൽനോട്ടത്തിൽ വെസ്റ്റേൺ സോൺ ഐജിപി അമിത് സിംഗിന്‍റെ മേൽനോട്ടത്തിലായിരുന്നു കീഴടങ്ങൽ. കൊപ്പൽ ഡിവൈഎസ്പി ബാലാജി സിങ്ങിന്‍റെ നേതൃത്വത്തിലുള്ള പ്രത്യേക അന്വേഷണ സംഘം നക്‌സലുകളെ മുഖ്യധാരയിലേക്ക് തിരിച്ചുവരുന്നത് പ്രോത്സാഹിപ്പിക്കുന്നതിനുള്ള നടപടിക്രമങ്ങൾ ഏകോപിപ്പിച്ചു. നക്‌സലുകളെ ബംഗളൂരുവിലെ പ്രത്യേക കോടതിയിൽ ഹാജരാക്കും. ഇവരുടെ കേസുകൾ ജുഡീഷ്യൽ സൂക്ഷ്മപരിശോധനയ്ക്ക് വിധേയമാകും.
ചിക്കമംഗളൂരു ചരിത്രപരമായി നക്സൽ കീഴടങ്ങലുകളുടെ കേന്ദ്രബിന്ദുവാണ്. മുൻ വർഷങ്ങളിൽ ഹഗലഘൻജി വെങ്കിടേഷ്, മല്ലിക, സിരിമാനെ നാഗരാജ് തുടങ്ങിയ മോസ്റ്റ് വാണ്ടഡ് നക്സലുകളും ഈ ജില്ലയിൽ ആയുധം ഉപേക്ഷിച്ചിരുന്നു.
