ഉത്തർപ്രദേശ് 'എൻകൗണ്ടർ' പ്രദേശായി മാറിയെന്നു ബിഎസ്പി നേതാവ് മായാവതി. ഉത്തർ പ്രദേശ് ഗവൺമെന്റിന്റെ പ്രവർത്തനത്തെക്കുറിച്ച് ഗൗരവമായ ചോദ്യങ്ങൾ ഈ സംഭവം ഉയർത്തുന്നുണ്ടെന്നു യുപി മുൻ മുഖ്യമന്ത്രിയായ മായാവതി പ്രതികരിച്ചു. സമാജ്വാദി പാർട്ടി മുൻ എംപിയായ അതീഖ് അഹമ്മദും സഹോദരനും ഇന്നലെയാണു വെടിയേറ്റു മരിച്ചത്.
രാജ്യം മുഴുവൻ ഇപ്പോൾ ഈ വിഷയം ചർച്ച ചെയ്യുകയാണ്. ഉമേഷ് പാൽ കൊലപതാകക്കേസ് പോലെ തന്നെ ഹീനമായ കൃത്യമാണു നടന്നിരിക്കുന്നത്. ഉത്തർ പ്രദേശിൽ നിയമവാഴ്ചയെക്കുറിച്ചുളള ഗൗരവമായ ചോദ്യങ്ങൾ ഉയരുന്നുണ്ട്. ഗുരുതരവും ഭീതി ജനിപ്പിക്കുന്നതുമായ സംഭവമാണിത്. ഇക്കാര്യത്തിൽ സുപ്രീം കോടതി ഇടപെടണം, മായാവതി പറഞ്ഞു.
