ദുബായ്: ദുബായിൽ പുതുവർഷ തലേന്ന് 2,502,474 പേർ പൊതു ഗതാഗത സംവിധാനം ഉപയോഗിച്ചതായി ദുബായ് ആർടിഎ അധികൃതർ അറിയിച്ചു. കഴിഞ്ഞ വർഷത്തേക്കാൾ 9.3% വർധനയാണ് ഈ വർഷമുണ്ടായിരിക്കുന്നത്. കഴിഞ്ഞ വർഷം പുതുവർഷത്തലേന്ന് 2,288,631 പേരാണ് പൊതുഗതാഗത സംവിധാനം ഉപയോഗിച്ചത്.
ദുബായ് മെട്രൊയുടെ റെഡ് - ഗ്രീൻ ലൈനുകളിലായി 1,133,251 യാത്രക്കാർ സഞ്ചരിച്ചു. ദുബായ് ട്രാം 55,391 പേരും, പൊതു ബസുകൾ 465,779 പേരും ഉപയോഗിച്ചു. സമുദ്ര ഗതാഗത സേവനങ്ങൾ 80,066 യാത്രക്കാർ ഉപയോഗിച്ചു. ഇ-ഹെയ്‌ലിംഗ് വാഹനങ്ങൾക്ക് 195,651 ഉപയോക്താക്കളെ ലഭിച്ചു. 1,238 യാത്രക്കാർ ഷെയറിങ് ഗതാഗത വാഹനങ്ങളിലും, 571,098 പേർ ടാക്സികളിലും സഞ്ചരിച്ചു.
പുതുവത്സരാഘോഷ വേദികളിലേക്കും പുറത്തേക്കുമുള്ള യാത്രക്കാരുടെ സഞ്ചാരം തടസങ്ങളില്ലാതെ സുരക്ഷിതമായി നടത്താൻ സാധിച്ചതിൽ സംതൃപ്തിയുണ്ടെന്ന് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി വ്യക്തമാക്കി
