വാരാന്ത്യത്തിൽ ദുബായിലും അബുദാബിയിലും അതിശക്തമായ ചൂട് അനുഭവപ്പെടുമെന്ന് കാലാവസ്ഥാ വകുപ്പ്

ദുബായ്: യുഎഇയിൽ വാരാന്ത്യത്തിൽ ചൂട് വർധിക്കുമെന്ന് കാലാവസ്ഥാ വകുപ്പ് മുന്നറിയിപ്പ് നൽകി. കാലാവസ്ഥാ മാറ്റത്തിനനുസൃതമായി മുൻകരുതലുകൾ എടുക്കണമെന്ന് അധികൃതർ താമസക്കാർക്ക് നിർദേശം നൽകി. ദുബായിൽ വ്യാഴാഴ്ചത്തെ ഉയർന്ന താപനില 41°C ഉം കുറഞ്ഞ താപനില 35°C ഉം ആയിരിക്കും. എന്നാൽ വെള്ളിയാഴ്ചയോടെ താപനില 46°C ആയി ഉയരുമെന്ന് അധികൃതർ മുന്നറിയിപ്പ് നൽകി.

അബുദാബിയിലും സമാനമായ സാഹചര്യങ്ങളാണ് നിലനിൽക്കുന്നത്. വ്യാഴാഴ്ച ഉയർന്ന താപനില 42°C ഉം കുറഞ്ഞ താപനില 33°C ഉം ആയിരിക്കും. അബുദാബിയിലും വെള്ളിയാഴ്ച താപനില 46°C ൽ എത്തുമെന്നും അറിയിപ്പിൽ പറയുന്നു.

വെള്ളിയാഴ്ച രാവിലെ ഈർപ്പം വർധിക്കുന്നത് മൂലം തീരദേശ പ്രദേശങ്ങളിൽ. മൂടൽമഞ്ഞ് രൂപപ്പെടാൻ സാധ്യതയുണ്ട്. ദേശിയ കാലാവസ്ഥാ വകുപ്പിന്റെ പ്രവചനമനുസരിച്ച് ഉൾപ്രദേശങ്ങളിൽ പരമാവധി താപനില 42°C നും 47°C നും ഇടയിലും തീരദേശ, ദ്വീപ് പ്രദേശങ്ങളിൽ ഇത് 40°C മുതൽ 44°C വരെയും പർവതപ്രദേശങ്ങളിൽ ഇത് 30°C നും 36°C നും ഇടയിലായിരിക്കുമെന്നും വ്യക്തമാക്കുന്നു. ബുധനാഴ്ച ഉച്ചകഴിഞ്ഞ് 3:30 ന് അൽ ദഫ്രയിലെ മെസൈറയിലാണ് ഏറ്റവും ഉയർന്ന താപനിലയായ 47.4°C രേഖപ്പെടുത്തിയത്.