പ്രവാസി ബുക്സിന്‍റെ ബഷീർ അനുസ്മരണവും പുസ്തക ചർച്ചയും
ഷാർജ: വൈക്കം മുഹമ്മദ് ബഷീറിന്‍റെ മുപ്പത്തിയൊന്നാം ചരമ ദിനത്തോടനുബന്ധിച്ച് പ്രവാസി ബുക്സിന്‍റെ നേതൃത്വത്തിൽ ബഷീർ അനുസ്മരണവും പുസ്തക ചർച്ചയും നടത്തി. ഹാരിസ് യൂനുസിന്‍റെ 'വെയിൽവേ സ്റ്റേഷൻ' എന്ന കവിതാ സമാഹാരവും റസീന ഹൈദറിന്‍റെ ഖാൻ യൂനിസിലെ ചെമ്പോത്ത് എന്ന നോവല്ലയുയുമാണ് ചർച്ച ചെയ്തത്.
കവി കമറുദ്ദൻ ആമയം പരിപാടി ഉദ്ഘാടനം ചെയ്തു. കെ. ഗോപിനാഥൻ ബഷീർ അനുസ്മരണ പ്രഭാഷണം നടത്തി. അജിത് കണ്ടല്ലൂരിന്‍റെ ബഷീർ അനുസ്മരണ സന്ദേശം എം.സി. നവാസ് ചടങ്ങിൽ വായിച്ചു. ചടങ്ങിൽ പ്രവീൺ പാലക്കീൽ മോഡറേറ്ററായിരുന്നു. ഗീതാഞ്ജലി, സിറാജ് നായർ എന്നിവർ പുസ്തക പരിചയം നടത്തി.
ഖാൻ യൂനിസിലെ ചെമ്പോത്ത് എന്ന നോവെല്ലയുടെ മൂന്നാം പതിപ്പിന്‍റെ കവർ മാധ്യമ പ്രവർത്തകൻ സി.എൻ.എൻ. ദിലീപിന് നൽകി ജെന്നി ജോസഫ് പ്രകാശനം ചെയ്തു.
ഷാർജ മുവൈലയിലെ അൽ സഹ്റ ചിൽഡ്രൻസ് സ്കിൽ ഡെവലപ്മെന്‍ററിൽ നടന്ന ചടങ്ങിൽ രാജേഷ് ചിത്തിര, ഹമീദ് ചങ്ങരംകുളം, അനുവന്ദന, ഉഷ ഷിനോജ്, അക്ബർ ആലിക്കര, ദീപ സുരേന്ദ്രൻ എന്നിവർ പുസ്തകാവലോകനം നടത്തി. ഹാരിസ് യൂനുസ്, റസീന ഹൈദർ എന്നിവർ മറുപടി പ്രസംഗം നടത്തി. അജിത് വള്ളോലി സ്വാഗതവും ഹമീദ് കാലിക്കറ്റ് നന്ദിയും പറഞ്ഞു.
