അന്താരാഷ്ട്ര ലഹരിക്കടത്ത് സംഘം ദുബായ് പോലീസിന്‍റെ പിടിയിൽ

ദുബായ്: യുഎഇയെയും അയൽരാജ്യങ്ങളെയും ലക്ഷ്യമിട്ട് പ്രവർത്തിച്ചിരുന്ന വൻ അന്താരാഷ്ട്ര ലഹരിമരുന്ന് കടത്ത് സംഘത്തെ പിടികൂടി ദുബായ് പൊലീസ്. സുരക്ഷാ ഏജൻസികൾ നടത്തിയ മിന്നൽ പരിശോധനയിൽ ഏകദേശം 200 കിലോ തൂക്കം വരുന്ന 2,67,000-ത്തിലധികം ആംഫെറ്റാമൈൻ മയക്കുമരുന്ന് ഗുളികകളാണ് അധികൃതർ പിടിച്ചെടുത്തത്.

യുഎഇ നാഷണൽ ആന്‍റി-നാർക്കോട്ടിക് അതോറിറ്റിയും സൗദി അറേബ്യൻ നാർക്കോട്ടിക് കൺട്രോൾ വിഭാഗവും സംയുക്തമായി നടത്തിയ ഓപ്പറേഷനിലാണ് അന്താരാഷ്ട്ര വിപണിയിൽ കോടികൾ വിലമതിക്കുന്ന ലഹരി മരുന്ന് ശേഖരം പിടികൂടിയത്.

അറസ്റ്റിലായ പ്രതികളെല്ലാം അറബ് പൗരന്മാരാണെന്നും ഇവരെ തുടർനടപടികൾക്കായി പബ്ലിക് പ്രോസിക്യൂഷന് കൈമാറിയെന്നും ദുബായ് പൊലീസ് അറിയിച്ചു.

രഹസ്യവിവരങ്ങളുടെ അടിസ്ഥാനത്തിൽ ആഴ്ചകളോളം നീണ്ട ആസൂത്രണത്തിനൊടുവിലാണ് ലഹരിക്കടത്ത് സംഘത്തിന്‍റെ വിതരണ ശൃംഖല പൂർണമായും തകർത്തത്.

ലഹരി മാഫിയകൾക്കെതിരേ യുഎഇയും സൗദി അറേബ്യയും സംയുക്തമായി നടത്തിയ നീക്കത്തിന്‍റെ വിജയമാണ് ഈ ലഹരിവേട്ടയെന്ന് അധികൃതർ വ്യക്തമാക്കി. ഇത്തരം വിനാശകരമായ ലഹരിവസ്തുക്കളിൽ നിന്ന് സമൂഹത്തെയും യുവതലമുറയെയും സംരക്ഷിക്കാൻ സുരക്ഷാ ഏജൻസികൾ അതീവ ജാഗ്രത പുലർത്തുകയാണെന്ന് പൊലീസ് അറിയിച്ചു.