നൊബേൽ സമ്മാന വാരത്തിന് തുടക്കം
സ്റ്റോക്ക്ഹോം: ഈ വർഷത്തെ നൊബേൽ സമ്മാന വാരത്തിന് തിങ്കളാഴ്ച സ്വീഡനിലെ സ്റ്റോക്ക്ഹോമിൽ തുടക്കമാകും. വൈദ്യശാസ്ത്ര നൊബേൽ ആണ് ആദ്യം പ്രഖ്യാപിക്കുക. ഉച്ചയ്ക്ക് മൂന്നിന് സ്റ്റോക്ക്ഹോമിലെ കരോലിൻസ്ക ഇൻസ്റ്റിറ്റ്യൂട്ടിലാണ് പുരസ്കാര പ്രഖ്യാപനം.
ചൊവ്വാഴ്ച ഭൗതികശാസ്ത്ര നൊബേലും ബുധനാഴ്ച രസതന്ത്ര നൊബേലും വ്യാഴാഴ്ച സാഹിത്യ നൊബേലും പ്രഖ്യാപിക്കും. വെള്ളിയാഴ്ച സമാധാന നൊബേൽ പ്രഖ്യാപിക്കും. സാമ്പത്തിക ശാസ്ത്രത്തിനുള്ള നൊബേൽ പുരസ്കാരം ഒക്റ്റോബർ 12ന് പ്രഖ്യാപിക്കും.
ഈ വർഷത്തെ സമ്മാനത്തുക 12 ദശലക്ഷം സ്വീഡിഷ് ക്രോണയാണ്. ഏകദേശം 1.2 ദശലക്ഷം യുഎസ് ഡോളറിന് തുല്യമാണിത്. വ്യക്തിക്കോ ചെറിയ സംഘത്തിനോ സംഘടനയ്ക്കോ ഈ തുക ലഭിക്കും.
കഴിഞ്ഞ വർഷം രോഗാണുക്കളെ ആക്രമിക്കുകയും ശരീരത്തിലെ സ്വന്തം കോശങ്ങളെ ഒഴിവാക്കുകയും ചെയ്യുന്നതിൽ രോഗപ്രതിരോധ സംവിധാനത്തെ സഹായിക്കുന്ന സംവിധാനത്തെക്കുറിച്ചുള്ള കണ്ടെത്തലുകൾക്ക് മൂന്ന് ശാസ്ത്രജ്ഞർക്കാണ് വൈദ്യശാസ്ത്ര നൊബേൽ ലഭിച്ചത്. മേരി ഇ. ബ്രങ്കോ, ഫ്രെഡ് റാംസ്ഡെൽ, ഡോ. ഷിമോൺ സകാഗുച്ചി എന്നിവർക്കായിരുന്നു പുരസ്കാരം. പെരിഫറൽ ഇമ്യൂൺ ടോളറൻസ് എന്നറിയപ്പെടുന്ന രോഗപ്രതിരോധ നിയന്ത്രണ സംവിധാനത്തെക്കുറിച്ചായിരുന്നു കണ്ടെത്തൽ.
ടൈപ്പ് 1 പ്രമേഹം, റൂമറ്റോയ്ഡ് ആർത്രൈറ്റിസ്, ലൂപ്പസ് തുടങ്ങിയ സ്വയംപ്രതിരോധ രോഗങ്ങളെ മനസിലാക്കുന്നതിൽ കണ്ടെത്തലുകൾ നിർണായകമാണെന്ന് വിദഗ്ധർ വിലയിരുത്തിയിരുന്നു.
