അബുദാബി: ഡെമോക്രാറ്റിക് റിപ്പബ്ലിക് ഓഫ് കോംഗോ, നൈജീരിയ, ദക്ഷിണാഫ്രിക്ക, ഐവറി കോസ്റ്റ്, കാമറൂൺ എന്നീ ആഫ്രിക്കൻ രാജ്യങ്ങളിലേക്ക് മങ്കി പോക്സ് വാക്സിനുകൾ എത്തിക്കുമെന്ന് യുഎഇ അറിയിച്ചു.
യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ നിർദേശങ്ങൾ പാലിച്ചാണ് ഈ മാനുഷിക നടപടി. വ്യോമ മാർഗമാണ് വാക്സിനുകൾ എത്തിക്കുക. ആരോഗ്യ രംഗത്ത് കാര്യമായ വെല്ലുവിളി ഉയർത്തുന്ന മങ്കി പോക്സ് വൈറസിന്റെ വ്യാപനം നിയന്ത്രിക്കുന്നതിനും ലഘൂകരിക്കുന്നതിനുമുള്ള ഈ രാജ്യങ്ങളുടെ ശ്രമങ്ങളെ ശക്തിപ്പെടുത്തുകയാണ് ഈ സംരംഭം വഴി ലക്ഷ്യമിടുന്നത്.
ആഗോള തലത്തിൽ മാനുഷികവും ആരോഗ്യപരവുമായ പ്രവർത്തനങ്ങൾ വർധിപ്പിക്കാനുള്ള യുഎഇയുടെ പ്രതിബദ്ധതയാണ് ഈ പിന്തുണ പ്രതിഫലിപ്പിക്കുന്നത് എന്നും പ്രതിസന്ധിയുടെയും ദുരന്തത്തിന്റെയും സമയങ്ങളിൽ മറ്റ് രാജ്യങ്ങളെ സഹായിക്കാനുള്ള തങ്ങളുടെ സമർപ്പണം ഇത് എടുത്തു കാണിക്കുന്നു എന്നും യുഎഇ സഹ മന്ത്രി ശൈഖ് ശഖ്ബൂത് ബിൻ നഹ്യാൻ അൽ നഹ്യാൻ പറഞ്ഞു.
