പരീക്ഷകളിലെ സുതാര്യത ഉറപ്പാക്കല്‍ ഗ​വ​ണ്മെ​ന്‍റി​ന്‍റെ അ​തി​വേ​ഗ ന​ട​പ​ടി​യും ദീ​ര്‍ഘ​കാ​ല പ്ര​തി​ബ​ദ്ധ​ത​യും

പരീക്ഷയുടെ സുതാര്യവും സുഗമവും നീതിയുക്തവുമായ നടത്തിപ്പ് ഉറപ്പാക്കാന്‍ വിദ്യാഭ്യാസ മന്ത്രാലയം ഉന്നതതല വിദഗ്ധ സമിതിക്കു രൂപം നല്‍കി
പരീക്ഷകളിലെ സുതാര്യത ഉറപ്പാക്കല്‍
പരീക്ഷകളിലെ സുതാര്യത ഉറപ്പാക്കല്‍

#പ്രൊഫ. ഹിമാന്‍ശു റായ്, ഡയറക്റ്റര്‍, ഐഐഎം ഇൻഡോര്‍

മത്സര പരീക്ഷകളുടെ സുതാര്യതയെക്കുറിച്ച് വര്‍ധിച്ചുവരുന്ന ആശങ്കകള്‍ക്ക് മറുപടിയായി, പ്രശ്നങ്ങള്‍ പരിഹരിക്കുന്നതിന് നമ്മുടെ ഗവണ്മെന്‍റ് അതിവേഗം നിര്‍ണായക നടപടികള്‍ സ്വീകരിച്ചു.

നീറ്റ് പിജി പരീക്ഷ മാറ്റിവച്ചതും ആറ് നഗരങ്ങളിലെ നീറ്റ്- യുജി പുനഃപരിശോധനയ്ക്കിടെ ചോദ്യപ്പേപ്പര്‍ ചോര്‍ന്നെന്ന ആരോപണവും, അടുത്തിടെയുണ്ടായ യുജിസി നെറ്റ് ചോദ്യപ്പേപ്പര്‍ ചോര്‍ച്ചയും, ഈ നിര്‍ണായക പരീക്ഷകളുടെ സത്യസന്ധതയും വിശ്വാസ്യതയും സംബന്ധിച്ച് രാജ്യവ്യാപകമായി വിദ്യാര്‍ഥികള്‍ക്കിടയില്‍ ഗുരുതരമായ സംശയങ്ങള്‍ ഉയര്‍ത്തി. എന്നിരുന്നാലും, നാഷണല്‍ ടെസ്റ്റിങ് ഏജന്‍സിയില്‍ (എന്‍ടിഎ) നേതൃമാറ്റങ്ങള്‍ നടപ്പാക്കിയതും വിദഗ്ധ സമിതികള്‍ സ്ഥാപിച്ചതും ഉള്‍പ്പെടെയുള്ള ഇന്ത്യാ ഗവണ്‍മെന്‍റിന്‍റെ സജീവമായ നടപടികള്‍, വിശ്വാസം പുനഃസ്ഥാപിക്കുന്നതിനും പരീക്ഷാ പ്രക്രിയയുടെ സുതാര്യത ഉറപ്പാക്കുന്നതിനുമുള്ള വ്യക്തമായ പ്രതിബദ്ധത പ്രകടമാക്കുന്നു.

ഈ പ്രവര്‍ത്തനങ്ങള്‍ ഉടനടിയുള്ള വെല്ലുവിളികളെ അഭിസംബോധന ചെയ്യുക മാത്രമല്ല, എല്ലാ വിദ്യാര്‍ഥികളിലും ആത്മവിശ്വാസം വീണ്ടും കെട്ടിപ്പടുക്കുന്നതിനും നീതി ഉറപ്പാക്കാനുമുള്ള ദീര്‍ഘകാല തന്ത്രത്തെ സൂചിപ്പിക്കുന്നു.

പരീക്ഷയുടെ സുതാര്യവും സുഗമവും നീതിയുക്തവുമായ നടത്തിപ്പ് ഉറപ്പാക്കാന്‍ വിദ്യാഭ്യാസ മന്ത്രാലയം ഉന്നതതല വിദഗ്ധ സമിതിക്കു രൂപം നല്‍കി. പരീക്ഷാ പ്രക്രിയകള്‍ പരിഷ്‌കരിക്കാനും ഡാറ്റാ സുരക്ഷാ നടപടിക്രമങ്ങള്‍ മെച്ചപ്പെടുത്താനും ഭാവിയിലുണ്ടായേക്കാവുന്ന തെറ്റുകളില്‍ നിന്ന് മികച്ച സുരക്ഷയ്ക്കായി എന്‍ടിഎയെ പുനഃക്രമീകരിക്കാനും പ്രവര്‍ത്തനക്ഷമമായ ശുപാര്‍ശകള്‍ രണ്ട് മാസത്തിനുള്ളില്‍ നല്‍കാനാണ് ഈ സമിതി ലക്ഷ്യമിടുന്നത്. കൂടാതെ, സിബിഐയുടെ ഇടപെടല്‍ സമഗ്രവും നിഷ്പക്ഷവുമായ അന്വേഷണത്തിനുള്ള പ്രതിബദ്ധതയെ സൂചിപ്പിക്കുന്നു. അത് ഉത്തരവാദികളെ തിരിച്ചറിയുക മാത്രമല്ല, അത്തരം തെറ്റുകള്‍ സംഭവിക്കാന്‍ അനുവദിക്കുന്ന വ്യവസ്ഥാപരമായ ബലഹീനതകള്‍ കണ്ടെത്തുകയും ചെയ്യും.

കൂടാതെ, അന്യായമായ രീതികള്‍ തടയുന്നതിനും തെറ്റു ചെയ്യാന്‍ സാധ്യതയുള്ളവരെ തടയുന്നതിനുമായി ഗവണ്മെന്‍റ് പൊതു പരീക്ഷാ നിയമം അവതരിപ്പിച്ചു. സത്യസന്ധമായി പരീക്ഷ നടത്തുന്നതില്‍ വിട്ടുവീഴ്ച ചെയ്ത് കുറ്റക്കാരെന്ന് കണ്ടെത്തുന്നവര്‍ക്ക് ഒരു കോടി രൂപ പിഴയും 10 വര്‍ഷം വരെ തടവും ഉള്‍പ്പെടെയുള്ള കര്‍ശനമായ ശിക്ഷയാണ് ഈ നിയമം ചുമത്തുന്നത്. ശക്തമായ പ്രതിരോധ സന്ദേശം നല്‍കാനും പൊതു പരീക്ഷകളുടെ പരിശുദ്ധി ഉയര്‍ത്തിപ്പിടിക്കാനും ഈ കടുത്ത നടപടികള്‍ അനിവാര്യമാണ്.

ഉടനടിയുള്ള കര്‍ശന നടപടികള്‍ അനിവാര്യമാണെങ്കിലും, പരീക്ഷാ സമ്പ്രദായത്തില്‍ ദീര്‍ഘകാല സുരക്ഷയും സത്യസന്ധതയും ഉറപ്പാക്കുന്നതിന് തുടര്‍നടപടികള്‍ നിര്‍ണായകമാണ്. ഓണ്‍ലൈന്‍ പരീക്ഷകള്‍ക്കായി, അത്യാധുനിക എന്‍ക്രിപ്ഷന്‍ ടെക്‌നിക്കുകളും ആധികാരികത ഉറപ്പാക്കുന്നതിനുള്ള വിവിധതല നടപടികളും കൊണ്ടുവരുന്നത് അനധികൃത പ്രവേശനത്തില്‍ നിന്നു സംരക്ഷണമേകും. പരീക്ഷാ പേപ്പറുകള്‍ സൃഷ്ടിക്കുന്നത് മുതല്‍ മൂല്യനിര്‍ണയം വരെ നിരീക്ഷിക്കാനും സുരക്ഷിതമാക്കാനും ബ്ലോക്ക്‌ചെയിന്‍ സാങ്കേതിക വിദ്യ ഉപയോഗിക്കാനാകും. ഇതിലൂടെ കൃത്രിമത്വം ഏതെങ്കിലും ഉണ്ടെങ്കില്‍ ഉടനടി കണ്ടെത്താനാകുമെന്ന് ഉറപ്പാക്കുന്നു.

പരമ്പരാഗത, ഓഫ്ലൈന്‍ പരീക്ഷകള്‍ക്ക്, ഓരോ ഘട്ടത്തിലും കര്‍ശനമായ സുരക്ഷാ നടപടികള്‍ പ്രധാനമാണ്. കൃത്രിമം കാട്ടാന്‍ സാധിക്കാതെ പരീക്ഷാസാമഗ്രികള്‍ പാക്ക് ചെയ്യുന്നത്, സുരക്ഷിതമായ ഗതാഗതം, കൈകാര്യം ചെയ്യുന്ന എല്ലാ ഇടങ്ങളിലെയും കര്‍ശനമായ പരിശോധനകള്‍ എന്നിവ ഇതില്‍ ഉള്‍പ്പെടുന്നു. ലോജിസ്റ്റിക്‌സിനായി തത്സമയ ജിപിഎസ് ട്രാക്കിങ് ഉപയോഗിക്കുന്നതും ഡിജിറ്റല്‍ വാട്ടര്‍മാര്‍ക്കിങ് ഉപയോഗിക്കുന്നതും ചോര്‍ച്ചയുടെ സാധ്യത ഗണ്യമായി കുറയ്ക്കും. നിര്‍മിതബുദ്ധി അധിഷ്ഠിത പ്രോക്റ്ററിങ് സംവിധാനങ്ങള്‍ ഉപയോഗിക്കുന്നത് പരീക്ഷകളില്‍ നിരീക്ഷണം വര്‍ധിപ്പിക്കുകയും തട്ടിപ്പിനുള്ള സാധ്യത കുറയ്ക്കുകയും ചെയ്യും. ബയോമെട്രിക് പരിശോധന പരീക്ഷാ പ്രക്രിയയ്ക്ക് സുരക്ഷയുടെ മറ്റൊരു തലം കൂടി ചേര്‍ക്കുന്നതോടെ, ഉദ്യോഗാര്‍ഥികളെ കൃത്യമായി തിരിച്ചറിയാന്‍ കഴിയും.

കൂടാതെ, സ്വതന്ത്ര സ്ഥാപനങ്ങള്‍ ഇടയ്ക്കിടെ സമഗ്ര ഓഡിറ്റ് നടത്തുന്നത് പരീക്ഷാ പ്രക്രിയയിലെ ബലഹീനതകള്‍ തിരിച്ചറിയാന്‍ സഹായിക്കും. സുതാര്യവും പതിവുള്ളതുമായ അവലോകനങ്ങള്‍ സുരക്ഷാ നടപടിക്രമങ്ങള്‍ പാലിക്കുന്നുണ്ടെന്നും എന്തെങ്കിലും പൊരുത്തക്കേടുകളുണ്ടെങ്കില്‍ അവ വേഗത്തില്‍ പരിഹരിക്കപ്പെടുമെന്നും ഉറപ്പാക്കുന്നു.

പരീക്ഷാ ബുക്ക്‌ലെറ്റ് ബോക്സുകള്‍ സ്വമേധയാ തുറക്കുന്നതിലേക്കും ചോദ്യപേപ്പറുകള്‍ വിതരണം ചെയ്യുന്നതിലെ കാലതാമസത്തിലേക്കും നയിക്കുന്ന ഡിജിറ്റല്‍ ലോക്കുകളില്‍ ഭാവിയിലുണ്ടായേക്കാവുന്ന പിശകുകള്‍ തടയുന്നതിന്, കര്‍ശനമായ അറ്റകുറ്റപ്പണി ക്രമങ്ങളും ബായ്ക്കപ്പ് നടപടിക്രമങ്ങളും നടപ്പിലാക്കേണ്ടതുണ്ട്. പതിവ് അറ്റകുറ്റപ്പണികള്‍ പരീക്ഷകള്‍ക്ക് മുമ്പ് ഡിജിറ്റല്‍ ലോക്കുകള്‍ പൂര്‍ണമായും പ്രവര്‍ത്തനക്ഷമമാണെന്ന് ഉറപ്പാക്കണം. കൂടാതെ, അടിയന്തര ഘട്ടത്തില്‍ സുരക്ഷിതമായ രീതിയില്‍ ഇക്കാര്യം കൈകാര്യം ചെയ്യുന്നതിന് ജീവനക്കാര്‍ക്ക് പരിശീലനം നല്‍കണം. ഈ നടപടികള്‍ തടസങ്ങള്‍ കുറയ്ക്കാനും പരീക്ഷയുടെ സത്യസന്ധത ഉയര്‍ത്തിപ്പിടിക്കാനും സഹായിക്കും.

വിദ്യാര്‍ഥികള്‍, രക്ഷിതാക്കള്‍, അധ്യാപകര്‍, നയ ആസൂത്രകര്‍ എന്നിവര്‍ ഉള്‍പ്പെടുന്ന പതിവ് ചര്‍ച്ചകള്‍ക്കൊപ്പം, നീതിയുടെയും സുതാര്യതയുടെയും ഗുണങ്ങള്‍ക്ക് ഊന്നല്‍ നല്‍കുന്ന സമഗ്രമായ ശില്‍പ്പശാലകള്‍, പരീക്ഷാ സുതാര്യത ഗണ്യമായി വര്‍ദ്ധിപ്പിക്കാന്‍ കഴിയുന്ന മുന്‍കരുതല്‍ നടപടികളെ പ്രതിനിധാനം ചെയ്യുന്നു. ഈ ചര്‍ച്ചകളില്‍ പങ്കാളികളെ ഉള്‍പ്പെടുത്തുന്നത് ജാഗ്രതയുള്ള സമൂഹത്തെ വളര്‍ത്തിയെടുക്കുകയും അതുവഴി ഉത്തര സൂചനകളിലേക്കുള്ള ഏതെങ്കിലും അനധികൃത പ്രവേശനത്തെ തടയുകയും ചെയ്യും. ഈ സംരംഭങ്ങള്‍ ഉടനടിയുള്ള ആശങ്കകള്‍ പരിഹരിക്കുക മാത്രമല്ല, പരീക്ഷാ പ്രക്രിയയില്‍ ദീര്‍ഘകാല മെച്ചപ്പെടുത്തലുകള്‍ക്ക് അടിത്തറയിടുകയും ചെയ്യുന്നു.

എന്‍ടിഎയ്ക്ക് കീഴില്‍ വിവിധ പരീക്ഷകള്‍ക്കായി പ്രതിവര്‍ഷം 10 ദശലക്ഷത്തിലധികം വിദ്യാര്‍ഥികള്‍ രജിസ്റ്റര്‍ ചെയ്യുന്നുണ്ട്. 2023ല്‍ മാത്രം 12.3 ദശലക്ഷം ഉദ്യോഗാര്‍ത്ഥികളാണ് രജിസ്റ്റര്‍ ചെയ്തത്. അതുകൊണ്ടുതന്നെ പരീക്ഷാ നടത്തിപ്പില്‍ ആഗോളതലത്തില്‍ മുന്‍നിരയിലാണ് എന്‍ടിഎ. ഈ ഗണ്യമായ പങ്കാളിത്തം, ഇന്ത്യയുടെ യുവജനങ്ങളുടെ അഭിലാഷങ്ങളെ രൂപപ്പെടുത്തുന്നതില്‍ പരീക്ഷകള്‍ വഹിക്കുന്ന സ്വാധീനശക്തിക്ക് അടിവരയിടുന്നു. ഈ എണ്ണത്തിന്‍റെയും ഇന്ത്യയിലെ പ്രശസ്തമായ വിദ്യാഭ്യാസ സമ്പ്രദായത്തിന്‍റെയും വെളിച്ചത്തില്‍, ദീര്‍ഘകാല സമഗ്രതയും വിശ്വാസ്യതയും ഉറപ്പാക്കാന്‍ ലക്ഷ്യമിട്ടുള്ള ഗവണ്‍മെന്‍റിന്‍റെ സജീവമായ നടപടികള്‍ പ്രശംസനീയവും ദൂരവ്യാപകവുമാണ്. ഈ പ്രവര്‍ത്തനങ്ങള്‍ പെട്ടെന്നുള്ള വെല്ലുവിളികളെ അഭിമുഖീകരിക്കുക മാത്രമല്ല, ദശലക്ഷക്കണക്കിന് വിദ്യാര്‍ഥികളുടെ സ്വപ്നങ്ങളും അഭിലാഷങ്ങളും സംരക്ഷിക്കുന്നതിനുള്ള ശക്തമായ അടിത്തറയിടുകയും ചെയ്യും. ഈ സമീപനം വിദ്യാഭ്യാസ സമ്പ്രദായത്തിലുള്ള വിശ്വാസം ശക്തിപ്പെടുത്തുമെന്നും വരുംതലമുറകള്‍ക്ക് നീതിയും സുതാര്യതയും പ്രോത്സാഹിപ്പിക്കുമെന്നും വാഗ്ദാനം ചെയ്യുന്നു.

മുന്നോട്ടു നോക്കുമ്പോള്‍, ഇന്ത്യയിലെ മത്സര പരീക്ഷകളുടെ ഭാവി, ന്യായവും കാര്യക്ഷമതയും ഉറപ്പാക്കുന്നതിന് ലക്ഷ്യമിട്ടുള്ള നൂതന തന്ത്രങ്ങളെ ആശ്രയിച്ചിരിക്കുന്നു. ഡിജിറ്റല്‍ സാങ്കേതിക വിദ്യകള്‍ വിദ്യാഭ്യാസത്തെ രൂപപ്പെടുത്തുന്നത് തുടരുമ്പോള്‍, ശക്തമായ ഡിജിറ്റല്‍ സുരക്ഷാ നടപടികള്‍ സ്വീകരിക്കുന്നത് നിര്‍ണായകമായ അനിവാര്യതയായി മാറുകയാണ്. ഓണ്‍ലൈന്‍ പരീക്ഷകള്‍ക്കായി അത്യാധുനിക എന്‍ക്രിപ്ഷന്‍ നടപടിക്രമങ്ങളും ആധികാരികത ഉറപ്പാക്കുന്ന കര്‍ശന സംവിധാനങ്ങളും നടപ്പാക്കുന്നത് സൈബര്‍ ഭീഷണികള്‍ക്കും അനധികൃത പ്രവേശനങ്ങള്‍ക്കുമെതിരായ കരുത്തുറ്റ പ്രതിരോധമായിരിക്കും. ഈ സജീവമായ സമീപനം മൂല്യനിര്‍ണയങ്ങളുടെ സമഗ്രത സംരക്ഷിക്കുക മാത്രമല്ല, പങ്കാളികള്‍ക്കിടയില്‍ വിശ്വാസം വളര്‍ത്തുകയും ചെയ്യുന്നു. ഡാറ്റാ അനലിറ്റിക്സിലെയും പ്രെഡിക്റ്റീവ് മോഡലിങ്ങിലെയും പുരോഗതി സ്വീകരിക്കുന്നത് പരീക്ഷാ ലോജിസ്റ്റിക്സും വിഭവവിന്യാസവും കൂടുതല്‍ മെച്ചപ്പെട്ടതാക്കാനും സുഗമമായ നിര്‍വഹണം ഉറപ്പാക്കാനും പ്രവര്‍ത്തന വെല്ലുവിളികള്‍ കുറയ്ക്കാനും സഹായിക്കും.

സാങ്കേതിക മുന്നേറ്റങ്ങളുടെയും വിദ്യാഭ്യാസ മുന്‍ഗണനകളുടെയും സംയോജനത്തോടെ, ഇന്ത്യന്‍ മത്സര പരീക്ഷകളുടെ പാത സുഗമമായ പ്രക്രിയകളിലേക്കും ഉയര്‍ന്ന വിശ്വാസ്യതയിലേക്കും നയിക്കും. മുന്നോട്ടുള്ള ഈ ചിന്താ തന്ത്രങ്ങള്‍ പാലിക്കുന്നതിലൂടെ, വിദ്യാഭ്യാസ സംവിധാനത്തിന് നീതി, സുതാര്യത, മികവ് എന്നിവയോടുള്ള പ്രതിബദ്ധത ഉയര്‍ത്തിപ്പിടിക്കാന്‍ കഴിയും. ഇത് ആത്യന്തികമായി വിദ്യാര്‍ഥികളുടെ അഭിലാഷങ്ങള്‍ക്കും രാജ്യത്തിന്‍റെ വിദ്യാഭ്യാസ സമ്പ്രദായത്തിന്‍റെ വിശ്വാസ്യതയ്ക്കും ഗുണമേകും.

Trending

No stories found.

Latest News

No stories found.