ചരിത്ര നേട്ടത്തിൽ കെൽട്രോൺ; വിറ്റുവരവ് 1,000 കോടി കവിഞ്ഞു

കേരള സർക്കാരിന്‍റെ വ്യവസായ വകുപ്പിന് കീഴിൽ ഇലക്‌ട്രോണിക്സ് മേഖലയിൽ പ്രവർത്തിക്കുന്ന പൊതുമേഖലാ സ്ഥാപനമായ കെൽട്രോൺ (കേരള സ്റ്റേറ്റ് ഇലക്‌ട്രോണിക്സ് ഡവലപ്‌മെന്‍റ് കോർപ്പറേഷൻ ലിമിറ്റഡ്) 1,056.94 കോടി രൂപയുടെ വിറ്റുവരവ് നേടി ചരിത്രത്തിലെ ഏറ്റവും മികച്ച പ്രകടനം കാഴ്ചവച്ചിരിക്കുകയാണ്. ഇലക്‌ട്രോണിക്സ് ഉത്പന്നങ്ങളുടെ നിർമാണ രംഗത്ത് പൊതുമേഖലയിൽ രാജ്യത്ത് ആദ്യമായി നിലവിൽ വന്ന സ്ഥാപനമാണ് കെൽട്രോൺ. ഇന്ത്യയിലെ ആദ്യ കളർ ടിവി നിർമാതാക്കൾ എന്ന നിലയിൽ രാജ്യം മുഴുവൻ പെരുമ നേടി കേരളത്തിന്‍റെ അഭിമാനമായി കെൽട്രോൺ ഉയർന്നുവന്നു. രൂപീകരണത്തിന്‍റെ 50 വർഷം പിന്നിടുമ്പോൾ ചരിത്രത്തിലെ ഏറ്റവും മികച്ച നേട്ടം കൈവരിക്കാൻ കമ്പനിക്ക് കഴിഞ്ഞിരിക്കുന്നു.

കേരള സർക്കാർ പ്രതിബദ്ധതയോടെ പിന്തുടരുന്ന പൊതുമേഖലാ സംരക്ഷണ നയത്തിന്‍റെ തണലിലാണ് ഈ മികവ് കെൽട്രോൺ കൈവരിച്ചത്. ഒരു സ്ക്രൂ പോലും ഉണ്ടാക്കാത്ത കെൽട്രോൺ എന്ന പരിഹാസ വചനങ്ങൾ ചിലരിൽ നിന്നുണ്ടായ സ്ഥാപനമാണ് ഇന്ന് രാജ്യത്തിന് മാതൃകയായി തലയുയർത്തി നിൽക്കുന്നത്. രണ്ടാം പിണറായി വിജയൻ സർക്കാർ ചുമതലയേറ്റ 2021-22 സാമ്പത്തിക വർഷം 521.71 കോടി രൂപയായിരുന്ന വാർഷിക വിറ്റുവരവാണ് നാലു വർഷത്തിനുള്ളിൽ 1,000 കോടിയിലേറെയായി ഉയർന്നത്.

തുടക്കത്തിൽ ശ്രദ്ധയൂന്നിയ ഇലക്‌ട്രോണിക്സ് മേഖലയ്ക്കു പുറമേ സിസ്റ്റം ഇന്‍റഗ്രേഷൻ, ഹാർഡ്‌വെയർ വില്പന, സോഫ്റ്റ്‌വെയർ ഡവലപ്‌മെന്‍റ്, നെറ്റ്‌വർക്കിങ്, നൈപുണ്യ വികസനം എന്നിങ്ങനെ വിവിധ തലത്തിലുള്ളതും വൈവിധ്യപൂർണവുമായ ബിസിനസാണ് കെൽട്രോൺ ഇപ്പോൾ നടത്തിവരുന്നത്. പ്രതിരോധം, സ്പെയ്‌സ്, പവർ ഇലക്‌ട്രോണിക്സ്, കൺട്രോൾ ആൻഡ് ഇൻസ്ട്രുമെന്‍റേഷൻ, സൗരോർജം, ഐടി, സുരക്ഷ നിരീക്ഷണം, എഐ അടിസ്ഥാനമാക്കിയുള്ള ട്രാഫിക് എൻഫോഴ്‌സ്മെന്‍റ്, ഇന്‍റലിജന്‍റ് ട്രാഫിക് മാനെജ്മെന്‍റ്, സ്മാർട്ട് സിറ്റി എന്നീ മേഖലകളിലും വിവിധ പദ്ധതികൾ ആവിഷ്കരിച്ചു നടപ്പിലാക്കിവരുന്നു. ട്രാഫിക് സിഗ്നലുകൾ, എൽഇഡി ലൈറ്റുകൾ, ഡിജിറ്റൽ ശ്രവണ സഹായികൾ എന്നിവയുടെ നിർമാണ രംഗത്തും കമ്പനി മികച്ച പ്രകടനം കാഴ്ചവയ്ക്കുന്നു.

കൃത്യസമയത്തുള്ള ബിസിനസ് ചുവട് മാറ്റവും, പ്ലാൻ ഫണ്ടുകളിലൂടെയും, ബജറ്റിലൂടെയും സംസ്ഥാന സർക്കാർ അനുവദിച്ച സാമ്പത്തിക സഹായങ്ങളും കെൽട്രോണിന്‍റെ മുഖം മാറ്റി. പല പദ്ധതികളിലും ടോട്ടൽ സൊല്യൂഷൻ പ്രൊവൈഡർ എന്ന നിലയിൽ അംഗീകരിക്കപ്പെട്ടത് പുതിയ മേഖലകളിലേക്ക് കടന്നുകയറാൻ സഹായകമായി. കെൽട്രോണിലെ ജീവനക്കാർ കമ്പനിയുടെ തിരിച്ചുവരവിനായി നടത്തിയ സഹനങ്ങളും കൂട്ടായ പരിശ്രമവും മുൻ വർഷങ്ങളിൽ വിറ്റുവരവിലും ലാഭത്തിലുമുണ്ടായ കുതിപ്പിന് ആധാരമായി. ഇന്ത്യയിലെ തന്നെ ആദ്യത്തെ സൂപ്പർ കപ്പാസിറ്റർ പ്ലാന്‍റ് പൊതുമേഖലയിൽ ആരംഭിക്കാനായതും സർക്കാരിന്‍റെ പിന്തുണ കൊണ്ടാണ്.

കെൽട്രോൺ ഗ്രൂപ്പ് ഓഫ് കമ്പനികൾ 2021-22 സാമ്പത്തിക വർഷം 612 കോടി രൂപയുടെ വിറ്റുവരവ് നേടി. 2022-23 സാമ്പത്തിക വർഷം ഇത് 583 കോടി രൂപ. 2023-24 സാമ്പത്തിക വർഷം 777 കോടി രൂപയുടെ വിറ്റുവരവ്. 2024-25 സാമ്പത്തിക വർഷം 1,200 കോടി രൂപ നേടിയെടുത്തു.

പ്രതിരോധ ഇലക്‌ട്രോണിക്സ് മേഖലയാണ് കെൽട്രോണിന്‍റെ മുഖ്യ കരുത്ത്. നാവികസേനയ്ക്കു വേണ്ടി ഒട്ടനവധി ഉത്പന്നങ്ങൾ കെൽട്രോൺ നിർമിച്ചു നൽകുന്നുണ്ട്. കെൽട്രോണിന്‍റെ സ്വന്തം സാങ്കേതികവിദ്യയും കൂടാതെ സി-ഡാക്കിന്‍റെയും എൻപിഒഎല്ലിന്‍റെയും സാങ്കേതികവിദ്യയും ഉപയോഗിച്ച് നിരവധി ഇലക്‌ട്രോണിക്സ് ഉത്പന്നങ്ങൾ - ടോവ്ഡ് അറെ സിസ്റ്റം, ട്രാൻസർ, സോണോബൈ, സോണാർ പവർ ആംപ്ലിഫൈർ, സോനാർ അരെ, എക്കോ സൗണ്ടർ, ഇ എം ലോഗ്, അണ്ടർ വാട്ടർ ടെലിഫോണി തുടങ്ങിയവ കെൽട്രോൺ തദ്ദേശീയമായി നിർമിച്ച് ഇന്ത്യൻ നേവിക്ക് നൽകുന്നു. ഓട്ടോണമസ് അണ്ടർ വാട്ടർ വെസൽസിനും സബ്‌മറൈനും വേണ്ടി ഇലക്‌ട്രോണിക്സ് ഉപകരണങ്ങൾ നിർമിച്ചു നൽകുന്ന പുതിയ പദ്ധതികൾ തുടങ്ങാനായത് കെൽട്രോണിന്‍റെ പ്രതിരോധ മേഖലയിലുള്ള ഉത്പന്ന നിർമാണത്തിന്‍റെ നാഴികക്കല്ലാണ്.

അതുപോലെ, സ്പേസ് ഇലക്‌ട്രോണിക്സ് മേഖലയിൽ ഐഎസ്ആർഒ സ്ഥാപനങ്ങളുമായി സഹകരിച്ച് അവരുടെ സാങ്കേതികവിദ്യ പ്രയോജനപ്പെടുത്തി സ്പേസ് ഇലക്‌ട്രോണിക്സിന് വേണ്ട ഉപകരണങ്ങൾ നിർമിച്ചു നൽകുന്നു. ഒട്ടുമിക്ക ഉപഗ്രഹ വിക്ഷേപണ സംവിധാനങ്ങളിലും മൊത്തമായുള്ള 300ഓളം ഇലക്‌ട്രോണിക്സ് ഉപകരണങ്ങളിൽ ഏകദേശം 40 എണ്ണം കെൽടോൺ നൽകുന്നതാണ്.

നിർമിത ബുദ്ധി അടിസ്ഥാനമാക്കിയുള്ള ട്രാഫിക് എൻഫോഴ്‌സ്മെന്‍റ് സിസ്റ്റം രാജ്യത്ത് ആദ്യമായി നടപ്പാക്കി വിപ്ലകാത്മക മാറ്റത്തിനു കെൽടോൺ തുടക്കമിട്ടു. കെൽട്രോൺ നടപ്പാക്കിയ ഈ അത്യാധുനിക പദ്ധതിയുടെ ഫലപ്രാപ്തിയും വിജയവും മനസിലാക്കി ഇതര സംസ്ഥാന സർക്കാരുകളും ഏജൻസികളും കെൽട്രോണിനെ സമീപിക്കുകയും പദ്ധതി നടപ്പാക്കുന്നതിനുള്ള പ്രാരംഭ ചർച്ചകൾ നടത്തിവരികയുമാണ്.

ഐടി അധിഷ്ഠിത ഇ- ഗവേണൻസ് നടപ്പാക്കി കെൽട്രോൺ പുതുമാതൃക സൃഷ്ടിച്ചു. കംപ്യൂട്ടറുകൾ, ലാപ്ടോപ്പുകൾ തുടങ്ങിയവ സെൻട്രലൈസ്‌ഡ്‌ പ്രൊക്യുമെന്‍റ് റേറ്റ് കോൺട്രാക്റ്റ് സിസ്റ്റം എന്ന സംവിധാനം വഴി വിവിധ സർക്കാർ വകുപ്പുകൾക്കും സ്കൂളുകൾക്കും നൽകിവരുന്നു. കൊവിഡ് കാലത്ത് ഏറ്റവും പ്രശംസ പിടിച്ചു പറ്റിയ ജയിൽ, കോടതി എന്നിവയെ ബന്ധിപ്പിക്കുന്ന വീഡിയോ കോൺഫറൻസിങ് സിസ്റ്റം, ഡാറ്റ സെന്‍ററുകൾ, ക്ലൗഡ് ഡാറ്റ സെർവറുകൾ തുടങ്ങിയ ഐടി ഇൻഫ്രാസ്ട്രക്‌ചർ സംവിധാനങ്ങൾ, വിവിധതരം സോഫ്റ്റ്‌വെയർ സൊല്യൂഷനുകൾ സ്മാർട്ട് ക്ലാസ് റൂം/ ഹൈ ടെക് ലാബ് പദ്ധതികൾ തുടങ്ങിയവ കെൽടോണിന്‍റെ ഐടി ബിസിനസ് യൂണിറ്റ് നൽകി വരുന്നു.

രാജ്യത്തെ മിക്ക നഗരങ്ങളും സ്മാർട്ട് സിറ്റിയാകുന്നതിന്‍റെ ഭാഗമായി പഴുതുകൾ ഇല്ലാത്ത സുരക്ഷാ സംവിധാനങ്ങൾ കെൽട്രോൺ സ്ഥാപിക്കുന്നുണ്ട്. അഹമ്മദാബാദ്, ബംഗളൂരു, ചെന്നൈ, കൊച്ചി, തിരുപ്പതി എന്നിവിടങ്ങളിൽ നിന്നും അതിനുള്ള ഓർഡറുകൾ നേടിയെടുക്കുകയും ചെയ്തു.

കെൽട്രോൺ കേരളത്തിന് പുറത്തും ആധുനിക സാങ്കേതിക വിദ്യയിൽ അധിഷ്ഠിതമായ ന്യൂതന പദ്ധതികൾ നടപ്പാക്കി പഴയ പ്രതാപത്തിലേക്ക് എത്തിച്ചേരാനുള്ള ജൈത്രയാത്രയിലാണ്. നാഗ്പുർ ഐടിഎംഎസ് പദ്ധതി, തിരുപ്പതി സ്മാർട്ട് സിറ്റി പദ്ധതി, എഫ്സിഐ സിസിടിവി പദ്ധതി, ഒഡിഷ, തമിഴ്‌നാട് സ്മാർട്ട് ക്ലാസ് റൂം ഹൈടെക് ലാബ് പദ്ധതികൾ തുടങ്ങിയവ അതിൽ പ്രധാനപ്പെട്ടതാണ്. കൂടാതെ വിദേശ രാജ്യങ്ങളിലും കെൽട്രോൺ പദ്ധതികൾ നടപ്പാക്കുന്നതിനുള്ള തയാറെടുപ്പിലാണ്.

ചരിത്രത്തിലെ ഏറ്റവും മികച്ച നേട്ടം സ്വന്തമാക്കുന്നതിന് കെൽട്രോണിനെ സഹായിച്ച മറ്റൊരു ഘടകം അതിന്‍റെ പ്രൊഫഷണൽ നേതൃത്വമാണ്. ഐഎസ്ആർഒയിലെ മുതിർന്ന ശാസ്ത്രജ്ഞനായിരുന്ന എൻ. നാരായണ മൂർത്തിയാണ് കെൽട്രോൺ ചെയർമാൻ. റിട്ട. വൈസ് അഡ്മിറൽ ശ്രീകുമാർ നായർ എംഡിയും. ടെക്നിക്കൽ ഡയറക്റ്ററായി എൻപിഒഎൽ മുൻ ഡയറക്റ്റർ ഡോ എസ്. വിജയൻ പിള്ളയും എക്സിക്യൂട്ടീവ് ഡയറക്റ്ററായി മുൻ ഐഎസ്ആർഒ ശാസ്ത്രജ്ഞൻ ഹേമചന്ദ്രനും പ്രവർത്തിക്കുന്നു. വിദഗ്ധരുടെ നേതൃത്വം പുതിയ ഉയരങ്ങൾ കീഴടക്കാൻ സഹായകമായി. ജീവനക്കാരുടെ സുതാര്യമായ നിയമനവും സ്ഥാപനത്തിന്‍റെ മികവ് വർധിപ്പിക്കാൻ സഹായകമായി. സർക്കാരിന്‍റെ പുതിയ വ്യവസായ നയത്തിന്‍റെ ഭാഗമായി വ്യവസായ വകുപ്പിൽ നിന്നുള്ള നയപരമായ പിന്തുണയും കെൽട്രോൺ ജീവനക്കാരുടെ കൂട്ടായ പ്രവർത്തനങ്ങളും വഴി കൂടുതൽ മെച്ചപ്പെട്ട പ്രവർത്തനം കാഴ്ചവയ്ക്കാനാണ് മാസ്റ്റർ പ്ലാനിലൂടെ ശ്രമിക്കുന്നത്. 1,400 കോടി രൂപയുടെ ഓർഡർ ബുക്കിങ് നേടാനും നടപ്പുവർഷം 1,000 കോടി രൂപയ്ക്ക് മുകളിൽ വിറ്റുവരവ് ഉയർത്താനുമാണ് ഈ സന്ദർഭത്തിൽ ലക്ഷ്യമിടുന്നത്.