തിരുവനന്തപുരം: പൊതുമരാമത്ത് മന്ത്രി പി.എ. മുഹമ്മദ് റിയാസ് നടത്തുന്ന 'റിങ് റോഡ്' ഫോണ്‍ ഇന്‍ പരിപാടിയിലേക്ക് മലപ്പുറം ജില്ലയിലെ അനൈഗ മോളുടെ കത്ത് ലഭിച്ചത് 2021 ജൂലൈ മാസത്തിലാണ്. കത്ത് വായിച്ച ഉടന്‍ തന്നെ മന്ത്രി അനൈഗയെ ഫോണില്‍ വിളിച്ച് സംസാരിച്ചു.
2018ലെ പ്രളയത്തില്‍ തകര്‍ന്ന ഏറനാട് മണ്ഡലത്തിലെ മതില്‍മൂല റോഡിന്‍റെ പ്രശ്നമാണ് അനൈഗയ്ക്കു മന്ത്രിയോട് പറയാനുണ്ടായിരുന്നത്. റോഡിന്‍റെ പുനര്‍നിര്‍മാണം വൈകുന്നത് കാരണം സ്വകാര്യവ്യക്തിയുടെ സ്ഥലത്ത് കൂടിയാണ് ഗതാഗതം നടക്കുന്നതെന്നും അനൈഗ മന്ത്രിയുടെ ശ്രദ്ധയില്‍പ്പെടുത്തി.
മതില്‍മൂല ഭാഗത്ത് അരിക് ഭിത്തി നിര്‍മിച്ച് സംരക്ഷിക്കുന്നതിനും എരുമമുണ്ട വരെ ബിഎം-ബിസി നിലവാരത്തില്‍ റോഡ് നവീകരിക്കുവാനും 5.50 കോടി രൂപ അനുവദിച്ച വിവരം അപ്പോള്‍ തന്നെ മന്ത്രി അനൈഗ മോളെ അറിയിച്ചിരുന്നു. ആ റോഡിന്‍റെ പ്രവൃത്തി ഇപ്പോള്‍ അവസാനഘട്ടത്തിലെത്തി. ഏറനാട് മണ്ഡലത്തിലെ അകമ്പാടം, മതില്‍മൂല, എരുമമുണ്ട പ്രദേശങ്ങളെയും നിലമ്പൂര്‍ മണ്ഡലത്തിലെ പാതാര്‍, ഭൂദാനം പ്രദേശങ്ങളെയും തമ്മില്‍ ബന്ധിപ്പിക്കുന്ന പ്രധാന പാതയായ അകമ്പാടം പാതാര്‍ റോഡിലെ മതില്‍മൂല മുതല്‍ എരുമമുണ്ട വരെയാണ് പ്രവൃത്തി നടത്തിയത്.
റോഡിന്‍റെ അരിക് ഭിത്തി നിര്‍മാണവും ബിഎം- ബിസി പ്രവൃത്തിയും പൂര്‍ത്തീകരിച്ചു. റോഡ് സേഫ്റ്റ് പ്രവൃത്തികളാണ് ഇപ്പോള്‍ പുരോഗമിക്കുന്നത്. പരാതി ശ്രദ്ധയില്‍പ്പെട്ട ഉടനെ ഇടപെട്ട മന്ത്രി മുഹമ്മദ് റിയാസിന് അനൈഗ മോള്‍ പ്രത്യേകം നന്ദി പറഞ്ഞു. നാടിന്‍റെ പ്രശ്നം ശ്രദ്ധയില്‍പ്പെടുത്താന്‍ ഇടപെട്ട അനൈഗമോളെ മന്ത്രി അഭിനന്ദിച്ചു.
മന്ത്രി പി.എ. മുഹമ്മദ് റിയാസ് നടത്തുന്ന റിങ് റോഡ് ഫോണ്‍ ഇന്‍ പരിപാടി രണ്ട് വര്‍ഷം പൂര്‍ത്തിയാക്കി. അടുത്ത റിങ് റോഡ് ഇന്ന് വൈകുന്നേരം 5നാണ്.
