മതിവരാതെ... മഹാപൂരം...

എം.എ. ഷാജി

തൃശൂര്‍: കാ​ണു​തെല്ലാം ഗജ​സൗ​ന്ദ​ര്യം. കേൾക്കുന്നതെ​ല്ലാം നാദ പ്രപഞ്ചം. കത്തുന്ന മേ​ട വെയിലിലും ഒഴുകിയെത്തിയ ജനലക്ഷങ്ങൾക്ക് ക​ണ്ണി​നും കാ​തി​നും ഇ​മ്പം പ​ക​ർ​ന്ന് മഹാപൂരം. മതിവരാ​ത്ത വിസ്മയക്കാഴ്ചകളുടെ നി​റ​ച്ചാ​ർ​ത്ത് ന​ൽ​കി വീ​ണ്ടും പൂ​രം.

ചൊവ്വാഴ്ച രാവിലെ കണിമംഗലം ശാസ്താവ് വടക്കുന്നാഥനിലേക്ക് എഴുന്നെള്ളിയതോടെയാണ് 30 മണിക്കൂര്‍ ഇടവേളയില്ലാതെ തുടരുന്ന പൂരങ്ങളുടെ പൂരത്തിന് തുടക്കം. തുടർന്ന് ചെമ്പൂക്കാവ് ഭഗവതി​യും പനമുക്കുംപിള്ളി ശാസ്താവും കാരമുക്ക്, ലാലൂർ, ചൂരക്കോട്ടുകാവ്, അയ്യന്തോൾ, നെയ്തലക്കാവ് ഭഗവതിമാരും ഊഴമനുസരിച്ച് വടക്കുന്നാഥനെ പ്രണമിക്കാനെത്തിയതോടെ നഗരം പൂരലഹരിയിലായി.

ബ്രഹ്മസ്വം മഠത്തിലേക്കുള്ള തിരുവമ്പാടി ഭഗവതിയുടെ എഴുന്നള്ളിപ്പ് രാവിലെ ഏഴിന് തു​ട​ങ്ങി. ന​ടു​വി​ൽ മ​ഠ​ത്തി​ലെ ഇ​റ​ക്കി​പ്പൂ​ജ​യ്ക്കു ശേ​ഷം 11.30ന് ​കോങ്ങാട് മധുവി​ന്‍റെ പ്ര​മാ​ണ​ത്തി​ൽ പ്ര​സി​ദ്ധ​മാ​യ മ​ഠ​ത്തി​ൽ വ​ര​വ് പ​ഞ്ച​വാ​ദ്യം. തിരുവമ്പാടി ചന്ദ്രശേഖ​ര​ൻ ഭഗവതിയുടെ തിടമ്പേറ്റി. നായ്‌ക്കനാലില്‍ പഞ്ചവാദ്യം കലാശിച്ചപ്പോൾ ചേരാനെല്ലൂർ ശങ്കരൻകുട്ട​ൻ മാരാരുടെ പ്രമാണത്തിൽ പാണ്ടിമേളം.

ഉച്ചയ്ക്ക് 12ന് ചെമ്പടയും ന​ട​പ്പാണ്ടിയും അകമ്പടിയാക്കി പാറമേക്കാവിലമ്മ പുറപ്പെട്ടു. ഗുരുവായൂർ നന്ദൻ തിടമ്പേറ്റി. എഴുന്നെള്ളിപ്പ് വടക്കുന്നാഥ ക്ഷേത്രത്തിലെ ഇലഞ്ഞി​ച്ചു​വ​ട്ടി​ലെ​ത്തി​യ​പ്പോ​ൾ ​കിഴക്കൂട്ട് അനിയൻമാരാരുടെ പ്രമാണത്തിൽ ഇലഞ്ഞിത്തറ മേളം. 4.30നു ​മേ​ളം ക​ലാ​ശി​ച്ചു. പാറമേക്കാവ്‌ ഭഗവതി ആദ്യം തെക്കേ ഗോപുരനടയിലൂടെ പുറത്തേക്കിറങ്ങി. പി​ന്നാ​ലെ തിരുവമ്പാടി ഭഗവതിയും... പി​ന്നെ മു​ഖാ​മു​ഖം നി​ന്ന് കു​ട​മാ​റ്റം. വടക്കുന്നാഥ ക്ഷേത്ര മൈതാനത്തും സ്വരാജ് റൗണ്ടിലുമായി തിങ്ങി നിറഞ്ഞിരുന്ന പു​രു​ഷാ​രം ഹ​ർ​ഷാ​ര​വം മു​ഴ​ക്കി. രാത്രിയിലും പൂരങ്ങളുടെ തനിയാവര്‍ത്തനം. പാറമേക്കാവിന്‍റെ രാത്രി പൂരത്തിന് പാറമേക്കാവ് കാശിനാഥനും തിരുവമ്പാടിയുടെ രാത്രി പൂരത്തിന് കുട്ടൻകുളങ്ങര അർജുനനും തിടമ്പേറ്റി. ഇന്ന് പകല്‍പ്പൂരത്തിന് ശേഷം വടക്കുന്നാഥ ക്ഷേത്രം ശ്രീമൂലസ്ഥാനത്ത് തിരുവമ്പാടി-പാറമേക്കാവ് ഭഗവതിമാര്‍ ഉപചാരം ചൊല്ലി പിരിയുന്നതോടെ ഇനി അടുത്ത പൂരത്തിനുള്ള കാത്തിരിപ്പ്.