ന്യൂയോർക്ക്: ന്യൂയോർക്കിലെ വിചിത്രമായ വിക്കറ്റിൽ വലിയ സ്കോറുകൾ പിറന്നില്ല. പക്ഷേ, ഇന്ത്യ - പാക്കിസ്ഥാൻ ക്രിക്കറ്റ് മത്സരത്തിന്‍റെ ആവേശം ഒട്ടും ചോർത്തിക്കളയാൻ വിക്കറ്റിനോ പലവട്ടം വിളിക്കാതെ വിരുന്നുവന്ന മഴയ്‌ക്കോ സാധിച്ചില്ല. ആദ്യം ബാറ്റ് ചെയ്ത് 119 റൺസ് മാത്രമേ നേടാൻ സാധിച്ചുള്ളൂ എങ്കിലും, എതിരാളികളെ ആറു റൺസ് അകലെ പിടിച്ചു കെട്ടിയ ഇന്ത്യൻ ബൗളർമാർ വിജയം പിടിച്ചെടുത്തു.
മത്സരത്തിൽ ഏറിയ പങ്കും മേധാവിത്വം പുലർത്തിയിട്ടും പാക്കിസ്ഥാനെ ഇടംവലം വിടാതെ പിടിച്ചുനിർത്തിയ ഇന്ത്യൻ പ്രീമിയർ ഫാസ്റ്റ് ബൗളർ ജസ്പ്രീത് ബുംറയാണ് പ്ലെയർ ഓഫ് ദ മാച്ച്. നാലോവർ ക്വോട്ട തികച്ച ബുംറ വെറും പതിനാല് റൺസാണ് വഴങ്ങിയത്, നേടിയത് നിർണായക സമയങ്ങളിൽ മൂന്ന് വിലപ്പെട്ട വിക്കറ്റുകളും.
120 റൺസ് വിജയം തേടിയിറങ്ങിയ പാക്കിസ്ഥാന് ക്യാപ്റ്റൻ ബാബർ അസമിന്‍റെ (13) വിക്കറ്റാണ് ആദ്യം നഷ്ടമായത്. ബുംറയുടെ പന്തിൽ സൂര്യകുമാർ യാദവിന്‍റെ മനോഹരമായ സ്ലിപ്പ് ക്യാച്ച്. അവിടെ നിന്ന് ഉസ്മാൻ ഖാനെ കൂട്ടുപിടിച്ച് അടിത്തറ പടുക്കാൻ മുഹമ്മദ് റിസ്വാന്‍റെ ശ്രമം. റിസ്വാന്‍റെ ക്യാച്ച് ശിവം ദുബെ ഫൈൻ ലെഗ്ഗിൽ നഷ്ടപ്പെടുത്തിയതിന് വലിയ വില കൊടുക്കേണ്ടി വരുമെന്നു തോന്നിയ സമയം.
57/1 എന്ന സുരക്ഷിതമായ നിലയിൽ പാക്കിസ്ഥാൻ. എന്നാൽ, അക്ഷർ പട്ടേൽ 13 റൺസെടുത്ത ഉസ്മാൻ ഖാനെ വിക്കറ്റിനു മുന്നിൽ കുടുക്കിയതോടെ ഇന്ത്യ തിരിച്ചുവരവ് തുടങഅങുകയായിരുന്നു. സിക്സറുമായി തുടങ്ങിയ ഫഖർ സമനെ (13) ഹാർദിക് പാണ്ഡ്യ ബുദ്ധിപരമായ ബൗളിങ്ങിലൂടെ ഋഷഭ് പന്തിന്‍റെ കൈകളിലെത്തിച്ചപ്പോൾ കളി അവസാന ഓവറുകളിലേക്ക് നീളുമെന്നുറപ്പായി.
ഇമാദ് വസിമിൽ മികച്ച പങ്കാളിയെ തേടിയ റിസ്വാൻ പാക്കിസ്ഥാന് പ്രതീക്ഷയായി അപ്പോഴും ക്രീസിലുണ്ടായിരുന്നു. എന്നാൽ, തന്‍റെ രണ്ടാം വരവിൽ ബുംറ ഒരു ലോ ബോളിലൂടെ റിസ്വാനെ ക്ലീൻ ബൗൾ ചെയ്തതോടെ കളി എങ്ങോട്ടും തിരിയുന്ന അവസ്ഥ. എന്നാൽ, ഇഫ്തിക്കർ അങമ്മദും ഷാദാബ് ഖാനും ക്രീസിൽ നിൽക്കുമ്പോൾ ലക്ഷ്യം അധികം അകലെയല്ലായിരുന്നു പാക്കിസ്ഥാന്.
പതിനേഴാം ഓവറിൽ ഷാദാബിനെ കൂടി ഋഷഭിന്‍റെ ഗ്ലൗസിലെത്തിച്ചു ഹാർദിക്. രണ്ടോവറിൽ 21 എന്ന ഇക്വേഷനിലേക്കാണ് ബുംറ വീണ്ടും പന്തെറിയാനെത്തുന്നത്. പത്തൊമ്പതാം ഓവറിൽ പിറന്നത് ഒരു ലെഗ് ബൈ ഉൾപ്പെടെ വെറും മൂന്നു റൺ, അവസാന പന്തിൽ ഇഫ്തിക്കറിന്‍റെ സുപ്രധാന വിക്കറ്റും വീണു. ഈ സമയം മാത്രമാണ് ഇന്ത്യ കളിയുടെ നിയന്ത്രണം ഏറ്റെടുത്തതായി തോന്നിച്ചത്.
അവസാന ഓവറിലെ ആദ്യ പന്തിൽ ഇമാദ് വസീമിനെ ഋഷഭ് പന്തിന്‍റെ മറ്റൊരു ഗംഭീര ക്യാച്ചിലൂടെ അർഷ്‌ദീപ് പുറത്താക്കുന്നു. പിന്നെ ഷഹീൻ അഫ്രീദിയെയും നസീം ഷായെയും പിടിച്ചുനിർത്താൻ സർദാർജിക്ക് തന്‍റെ കഴിവിന്‍റെ പകുതി പോലും പുറത്തേടുക്കേണ്ടി വന്നില്ല. ഒരു ഫോർ ഉൾപ്പെടെ 12 റൺസ് ആ ഓവറിൽ വന്നെങ്കിലും വിജയം അപ്പോഴേക്കും പാക്കിസ്ഥാന്‍റെ ബാറ്റിൽ നിന്ന് ഒരുപാട് അകലെയായിക്കഴിഞ്ഞിരുന്നു.
ബുംറയെ കൂടാതെ 24 റൺസിന് രണ്ട് വിക്കറ്റ് നേടിയ ഹാർദിക് പാണ്ഡ്യയാണ് ഇന്ത്യയുടെ പ്രധാന വിക്കറ്റ് വേട്ടക്കാരനായത്. അർഷ്‌ദീപിന്‍റെ ഒരു വിക്കറ്റിന് 31 റൺസിന്‍റെ വില നൽകേണ്ടി വന്നു. അക്ഷർ പട്ടേൽ രണ്ടോവർ മാത്രം എറിഞ്ഞപ്പോൾ 11 റൺസ് വഴങ്ങി ഒരു വിക്കറ്റ് നേടി. രവീന്ദ്ര ജഡേജയും രണ്ടോവറിൽ ഒതുങ്ങി, വിട്ടുകൊടുത്തത് 10 റൺസ്, വിക്കറ്റില്ല. മുഹമ്മദ് സിറാജിനും വിക്കറ്റൊന്നും കിട്ടിയില്ലെങ്കിലും, നാലോവറിൽ 19 റൺസ് മാത്രമാണ് വഴങ്ങിയത്.
