ഫീൽഡ് ചെയ്യുന്നതിനിടെ നെഞ്ചുവേദന, മുൻ രഞ്ജി താരത്തിന് ദാരുണാന്ത്യം

ബെംഗളൂരു: മത്സരത്തിനിടെ ഹൃദയാഘാതത്തെ തുടർന്ന് ക്രിക്കറ്റ് താരം അന്തരിച്ചു. കർണാടക മുൻ രഞ്ജി ക്രിക്കറ്റ് താരം എസ്.എൽ. അക്ഷയ് ആണ് മരിച്ചത്. 39 വയസായിരുന്നു. ഞായറാഴ്ച ബെംഗളൂരു കെആർ പുരത്ത് ലോക്കൽ ഡിവിഷൻ ക്രിക്കറ്റ് മത്സരം കളിക്കുന്നതിനിടെയാണ് അക്ഷയ്ക്ക് ഹൃദയാഘാതമുണ്ടായത്.

ഫീൽഡ് ചെയ്യുന്നതിനിടെ താരത്തിന് പെട്ടെന്ന് നെഞ്ചുവേദന അനുഭവപ്പെടുകയായിരുന്നു. ഉടൻ തന്നെ അടുത്തുള്ള ആശുപത്രിയിൽ എത്തിച്ചെങ്കിലും രക്ഷിക്കാനായില്ല. മുൻ ഇന്ത്യൻ ക്രിക്കറ്റ് താരം ദൊഡ ഗണേഷാണ് അക്ഷയ്‌യുടെ മരണ വാർത്ത പങ്കുവച്ചത്. അണ്ടർ 19ൽ കളിക്കുന്നതു മുതൽ അക്ഷയ്‌യെ അറിയാമെന്നും തന്‍റെ ദുഃഖം പ്രകടിപ്പിക്കാൻ വാക്കുകൾ കിട്ടുന്നില്ലെന്നുമാണ് അദ്ദേഹം കുറിച്ചത്. കർണാടക സ്റ്റേറ്റ് ക്രിക്കറ്റ് അസോസിയേഷനും (കെഎസ്‌‍സിഎ) അക്ഷയ്‌ക്ക് ആദരാഞ്ജലികൾ അർപ്പിച്ചു.

കർണാടകയിലെ ഷിവമോഗ സ്വദേശിയാണ് എസ്.എൽ. അക്ഷയ്. രഞ്ജി ട്രോഫിയിൽ കർണാടകയെ പ്രതിനിധീകരിച്ച് കളിച്ചിട്ടുണ്ട്. ഇപ്പോൾ മഹാരാജ ട്രോഫി കെഎസ്‌സിഎ ടി20 എന്ന് അറിയപ്പെടുന്ന കർണാടക പ്രീമിയർ ലീഗിലും കളിച്ചിട്ടുണ്ട്. അക്ഷയ്‌യുടെ അകാലവിയോഗം ക്രിക്കറ്റ് ലോകത്തെ ഞെട്ടിച്ചിരിക്കുകയാണ്.