തായിഫ്: മറ്റൊരു റെക്കോഡ്കൂടി സ്വന്തമാക്കി ക്രിസ്റ്റിയാനോ റൊണാള്ഡോ. ഫുട്ബോള് ചരിത്രത്തില് ഏറ്റവുമധികം ഹെഡ്ഡര് ഗോള്നേടിയ താരമെന്ന റെക്കോഡാണ് ക്രിസ്റ്റ്യാനോ റൊണോള്ഡോ കഴിഞ്ഞ ദിവസം സ്വന്തമാക്കിയത്. അറബ് ക്ലബ്ബ് ചാംപ്യന്സ് കപ്പ് ഫുട്ബോളില് ടുണീഷ്യന് ടീമായ മൊണാസ്റ്റിറിനെതിരേ തലഗോള് നേടിയാണ് അല് നസ്റിനുവേണ്ടി താരം ചരിത്രംകുറിച്ചത്.
74-ാം മിനിറ്റിലായിരുന്നു ഗോള്. ഇതുവരെ റൊണാള്ഡോ 145 ഗോളുകള് ഹെഡ്ഡറിലൂടെ നേടിയിട്ടുണ്ട്. ജര്മനിയുടെ ഗേര്ഡ് മുള്ളറുടെ ഹെഡ്ഡര് ഗോള് റെക്കോഡാണ് (144) ക്രിസ്റ്റ്യാനോ ഭേദിച്ചത്. സ്പെയിനിന്റെ കാര്ലോസ് സാന്റിയാന (125), ബ്രസീല് ഇതിഹാസം പെലെ (124) എന്നിവരാണ് തുടര്ന്നുള്ള സ്ഥാനങ്ങളില്.അല് നസ്ര് 4-1ന് ജയിച്ച മത്സരത്തില് വിജയികള്ക്കായി ടലിസ്ക (42), അബ്ദുള്ള അല് അംരി (88), അബ്ദുല് അസീസ് സൗദ് അല് എലെവായ് (90) എന്നിവരും സ്കോര് ചെയ്തു.
66-ാം മിനിറ്റില് അല് നസ്റിന്റെ അലി ലജമിയുടെ സെല്ഫ് ഗോളാണ് മൊണാസ്റ്റിറിന് ആശ്വാസമായത്.അറബ് ക്ലബ്ബ് ചാമ്പ്യന്സ് കപ്പിലെ ഗ്രൂപ്പ് സി-യില് ഒന്നാമതാണ് അല് നസ്ര്. സമലെകിനെതിരായ അടുത്ത മത്സരം ജയിച്ചാല് ടീമിന് ക്വാര്ട്ടറിലെത്താം.