ഡുനെഡിന് (ന്യൂസിലന്ഡ്): വനിതാ ഫുട്ബോള് ലോകകപ്പില് ദക്ഷിണാഫ്രിക്കയ്ക്കെതിരേ രണ്ട് ഗോളിന് പിന്നിലായ ശേഷം അര്ജന്റീന വനിതകള് തിരിച്ചുവരവ് നടത്തി സമനില പിടിച്ചപ്പോള് ഇംഗ്ലണ്ടും ചൈനയും ഏകപക്ഷീയമായ ഒരു ഗോളിന് വിജയിച്ചു. ചൈന ഹെയ്തിയെ 1-0നും ഇംഗ്ലണ്ട് ഡെന്മാര്ക്കിനെ 1-0നുമാണ് കീഴ്പ്പെടുത്തിയത്.
ഗ്രൂപ്പ് ജിയില് നടന്ന മത്സരത്തില് ദക്ഷിണാഫ്രിക്കയും അര്ജന്റീനയും രണ്ട് വീതം ഗോളുകള് നേടി. 74-ാം മിനിറ്റ് വരെ രണ്ട് ഗോളുകള്ക്ക് പിന്നിലായിരുന്ന അര്ജന്റീന അഞ്ച് മിനിറ്റുകള്ക്കിടെയാണ് രണ്ട് ഗോള് തിരിച്ചടിച്ചത്.30-ാം മിനിറ്റില് ലിന്ഡ മോട്ടല്ഹാലോയിലൂടെ ദക്ഷിണാഫ്രിക്ക മുന്നിലെത്തി. പിന്നാലെ 66-ാം മിനിറ്റില് തെംബി ഗാട്ട്ലാനയും സ്കോര് ചെയ്തതോടെ അവര് ലോകകപ്പ് ചരിത്രത്തിലെ തങ്ങളുടെ ആദ്യ ജയം സ്വപ്നം കണ്ടു തുടങ്ങി.എന്നാല് 74-ാം മിനിറ്റില് സോഫിയ ബ്രൗണിലൂടെ ഒരു ഗോള് തിരിച്ചടിച്ച അര്ജന്റീന 79-ാം മിനിറ്റില് റോമിന ന്യൂനെസിലൂടെ രണ്ടാം ഗോളും മടക്കി.
അതേസമയം, അര്ജന്റീനയ്ക്ക് ലോകകപ്പിന്റെ പ്രീക്വാര്ട്ടറിലേക്ക് പ്രവേശിക്കാനുള്ള സാധ്യത മങ്ങി. കാരണം ഗ്രൂപ്പില് ജയില് ഒരു പോയിന്റ് മാത്രമുള്ള അര്ജന്റീന നാലാമതാണ്. രണ്ട് മത്സരങ്ങള് കളിച്ച അവര്ക്ക് ഇനി ഒരു മത്സരമാണ് പ്രാഥമിക രൗണ്ടില് ഉള്ളത്.
ഗ്രൂപ്പ് ഡിയിലെ നിര്ണായക പോരാട്ടത്തില് ഇംഗ്ലണ്ട് ഏകപക്ഷീയമായ ഒരുഗോളിന് ഡെന്മാര്ക്കിനെ പരാജയപ്പെടുത്തിയപ്പോള് ഗോള് നേടിയത് ലോറന് ജയിംസായിരുന്നു. ആറാം മിനിറ്റില് നേടിയ ഗോളില് ശക്തമായ പ്രതിരോധം ഇംഗ്ലീഷ് പെണ്പട തീര്ത്തു. ഗ്രൂപ്പ് ഡിയിലെ മറ്റൊരു മത്സരത്തില് ചൈനീസ് പട ഹെയ്തിയെ തോല്പ്പിച്ചു. 74-ാം മിനിറ്റില് പെനാല്റ്റിയിലൂടെ വാങ് ഷുവാങ്ങാണ് ചൈനയുടെ വിജയഗോളുകള് നേടിയത്. 29-ാം മിനിറ്റില് സാങ് റുയി ചുവപ്പുകാര്ഡ് കണ്ട് പുറത്തായതോടെ 10 പേരുമായാണ് ചൈന കളിച്ചത്.
ഇന്ന് മൂന്നു മത്സരങ്ങളാണുള്ളത്. ഉച്ചയ്ക്ക് ഒന്നിന് നടക്കുന്ന മത്സരത്തില് സ്വീഡന് ഇറ്റലിയെയും മൂന്നിന് നടക്കുന്ന കരുത്തരുടെ പോരാട്ടത്തില് ബ്രസീല് ഫ്രാന്സിനെയും വൈകിട്ട് ആറിന് നടക്കുന്ന മത്സരത്തില് പാനമ, ജമൈക്കയെയും നേരിടും.