റൈഫി വിൻസന്‍റ് ഗോമസ്.
കൊച്ചി: കെസിഎൽ രണ്ടാം സീസണിലേക്കുള്ള പരിശീലക സംഘത്തെ പ്രഖ്യാപിച്ച് കൊച്ചി ബ്ലൂ ടൈഗേഴ്സ്. കേരളത്തിന്‍റെ മുൻ രഞ്ജി ട്രോഫി താരവും ഇന്ത്യൻ അണ്ടർ 19 ടീമംഗവുമായിരുന്ന റൈഫി വിൻസെന്‍റ് ഗോമസാണ് ഹെഡ് കോച്ച്. മുൻ രഞ്ജി താരം സി.എം. ദീപക്കിനെ കോച്ചിങ് ഡയറക്റ്ററായും നിയമിച്ചു. എ.ടി. രാജാമണി, സനുത് ഇബ്രാഹിം, എസ്. അനീഷ് എന്നിവരാണ് മറ്റ് പരിശീലക‍ർ. റോബർട്ട് ഫെർണാണ്ടസ്, ഉണ്ണികൃഷ്ണൻ, ക്രിസ്റ്റഫർ ഫെർണാണ്ടസ്, സജി സോമസുന്ദരം, ഗബ്രിയേൽ ബെൻ, മാത്യു ചെറിയാൻ എന്നിവരും സപ്പോർട്ട് സ്റ്റാഫായി ടീമിനൊപ്പമുണ്ടാകും.
കേരളത്തിൽ നിന്ന് ഐപിഎൽ കളിച്ച ആദ്യ താരങ്ങളിൽ ഒരാളാണ് ടീമിന്‍റെ ഹെഡ് കോച്ചായ റൈഫി വിൻസെന്‍റ് ഗോമസ്. പ്രശസ്തമായ ബോ‍ർഡർ - ഗാവസ്കർ സ്കോള‍ർഷിപ്പിന് അ‍ർഹനായ ആദ്യ കേരള താരവും റൈഫിയാണ്. അണ്ടർ-19 തലത്തിൽ ഇന്ത്യയെയും രഞ്ജിയിൽ കേരളത്തെയും പ്രതിനിധീകരിച്ചു. ലിസ്റ്റ് എ ക്രിക്കറ്റിൽ ഒരോവറിൽ അഞ്ച് സിക്സും ഒരു ഫോറും നേടിയ അപൂർവ റെക്കോഡിനും ഉടമയാണ്. രഞ്ജി ട്രോഫിയിൽ പോണ്ടിച്ചേരി ടീമിന്‍റെ കോച്ചായിരുന്ന റൈഫി, രാജസ്ഥാൻ റോയൽസിന്‍റെ ഹൈ പെ‍ർഫോമൻസ് കോച്ചായും പ്രവർത്തിച്ചിട്ടുണ്ട്. വിജയങ്ങൾക്കൊപ്പം ടീമിന്‍റെയും താരങ്ങളുടെയും ഭാവി കൂടി മുന്നിൽക്കണ്ട് പ്രത്യേക കാഴ്ചപ്പാടോടെയുള്ള പരിശീലന രീതിയാണ് റൈഫിയുടേത്.
കഴിഞ്ഞ സീസണിൽ സെബാസ്റ്റ്യൻ ആന്‍റണിക്കൊപ്പം ടീമിന്‍റെ സഹപരിശീലകനായിയിരുന്ന സി.എം. ദീപക്കാണ് ടീമിന്‍റെ കോച്ചിങ് ഡയറക്റ്റർ. രഞ്ജിയിൽ കേരളത്തിനു വേണ്ടി സെഞ്ച്വറി നേടിയ ആദ്യ വിക്കറ്റ് കീപ്പർ ബാറ്ററാണ്. ബിസിസിഐ ലെവൽ ടു കോച്ചായ അദ്ദേഹം കേരളത്തിന്‍റെ ജൂനിയ‍ർ ടീമിന്‍റെ സെലക്ഷൻ കമ്മറ്റി ചെയർമാനും പ്രതിഭകളെ കണ്ടെത്താനുള്ള കെസിഎ സംഘത്തിലെ അംഗവുമായിരുന്നു. ചെന്നൈ സൂപ്പർ കിങ്സ് അക്കാഡമിയുടെ ബാറ്റിങ് കൺസൾട്ടന്‍റ് കൂടിയായിരുന്നു ദീപക്.
കേരളത്തിന്‍റെ രഞ്ജി ട്രോഫി താരവും അണ്ടർ-19 ക്യാപ്റ്റനുമായിരുന്ന സനുത് ഇബ്രാഹിം ആണ് ടീമിന്‍റെ ഫീൽഡിംഗ് കോച്ച്. കൊൽക്കത്ത നൈറ്റ് റൈഡേഴ്സ് അക്കാഡമിക്കൊപ്പം പ്രവർത്തിച്ചിട്ടുള്ള സനുത് ലോക ക്രിക്കറ്റ് ലീഗിൽ ഒമാനു വേണ്ടി കളിച്ചിട്ടുണ്ട്. കഴിഞ്ഞ തവണ ബൗളിങ് കോച്ചായിരുന്ന എസ്. അനീഷ് ഈ സീസണിലും അതേ സ്ഥാനത്ത് തുടരും. രഞ്ജി - ദുലീപ് ട്രോഫി താരമായിരുന്ന അനീഷ്, കേരളത്തിന്‍റെ അണ്ടർ-16 ടീമിന്‍റെ ഹൈ പെ‍ർഫോമൻസ് കോച്ചായും പ്രവർത്തിച്ചിട്ടുണ്ട്. എ.ടി. രാജാമണി പ്രഭുവാണ് ടീമിന്‍റെ സ്ട്രെങ്ത് ആൻഡ് കണ്ടീഷനിങ് കോച്ച്. ആർ. അശ്വിൻ അടക്കമുള്ള ഇന്ത്യൻ താരങ്ങളുടെ കരിയറിൽ നിർണായക സ്വാധീനം ചെലുത്തിയിട്ടുള്ള രാജാമണി, ഐപിഎല്ലിൽ രാജസ്ഥാൻ റോയൽസിനൊപ്പം പ്രവർത്തിച്ചിട്ടുണ്ട്.
കേരള രഞ്ജി ടീമംഗമായിരുന്ന റോബർട്ട് ഫെർണാണ്ടസ് ടീമിന്‍റെ മെന്‍റ‍റായാണ് പ്രവർത്തിക്കുക. ഫിസിയോ ആയി ഉണ്ണികൃഷ്ണനും ട്രെയിനറായി ക്രിസ്റ്റഫർ ഫെർണാണ്ടസും വീഡിയോ അനലിസ്റ്റായി സജി സോമസുന്ദരവും ത്രോ ഡൗൺ സ്പെഷ്യലിസ്റ്റായി ഗബ്രിയേൽ ബെന്നും ടീമിനൊപ്പം ഉണ്ടാകും. മാത്യു ചെറിയാനാണ് ടീമിന്‍റെ മാനേജ‍ർ.
