ഹൈദരാബാദ്: രോഹിത് ശര്മ്മയ്ക്ക് ശേഷം ഇന്ത്യന് ടെസ്റ്റ് ടീമിന്റെ നായകനാകാന് താത്പര്യം തുറന്ന് പറഞ്ഞ് പേസര് ജസ്പ്രീത് ബുമ്ര. ഇന്ത്യന് നായകനാകാന് അവസരം ലഭിച്ചാല് തനിക്ക് സന്തോഷമെന്ന് ബുമ്ര പറഞ്ഞു. ഇന്ത്യയെ ഒരു ടെസ്റ്റില് മാത്രമാണ് ബുമ്ര നയിച്ചിട്ടുള്ളത്.
രോഹിത് ശര്മ്മയുടെ അഭാവത്തില് ഇംഗ്ലണ്ടിനെതിരേ അവരുടെ നാട്ടില് നടന്ന മത്സരത്തില് പക്ഷേ ഇന്ത്യ പരാജയപ്പെട്ടു. അയര്ലന്ഡില് മൂന്ന് ട്വന്റി 20 മത്സരങ്ങളിലും ഇന്ത്യ ബുമ്രയ്ക്ക് കീഴിൽ ഇറങ്ങിയിട്ടുണ്ട്.
36 വയസ് പിന്നിട്ട ഇന്ത്യന് നായകന് രോഹിത് ശര്മ്മയുടെ കരിയര് ഇനി അധികനാള് നീണ്ടേക്കില്ല. ഈ സാഹചര്യത്തില് കൂടിയാണ് ബുമ്രയുടെ പ്രതികരണം. ഒരു ടെസ്റ്റില് ഇന്ത്യയെ നയിക്കാന് കഴിഞ്ഞത് വലിയ അംഗീകാരമെന്ന് താരം പറഞ്ഞു. "ടെസ്റ്റ് കളിക്കുക മഹത്തരമാണ്. നായകനാകുക അതിലേറെ മഹത്തരവുമാണ്. ഒരു ഫാസ്റ്റ് ബൗളറെന്ന നിലയില് എനിക്ക് ചിലപ്പോള് ഫൈനല് ലെഗില് ഫീല്ഡ് ചെയ്യേണ്ടി വരും. എങ്കിലും ടീമിന്റെ എല്ലാ തീരുമാനങ്ങളിലും ഭാഗമാകുന്നത് സന്തോഷകരമാണ്''- ബുമ്ര പറയുന്നു.