തൃശൂർ ടൈറ്റൻസ് കെസിഎൽ ടീം.
കൂടുതല്‍ കരുത്തോടെ കെസിഎല്ലിന്‍റെ രണ്ടാം സീസണിനു വേണ്ടിയുള്ള തയാറെടുപ്പിലാണ് തൃശൂര്‍ ടൈറ്റന്‍സ്. കേരള താരവും രഞ്ജി ട്രോഫി ടീമിന്‍റെ മുന്‍ ക്യാപ്റ്റനുമായ സിജോമോന്‍ ജോസഫിനു കീഴിലാണ് തൃശൂര്‍ ടൈറ്റന്‍സ് ഈ സീസണില്‍ കളിക്കാനിറങ്ങുക. മുന്‍ ഇന്ത്യ അണ്ടര്‍-19 താരം കൂടിയാണ് സിജോ. ഓഫ് സ്പിന്നറും മധ്യനിര ബാറ്ററുമായ അക്ഷയ് മനോഹറാണ് വൈസ് ക്യാപ്റ്റന്‍.
കഴിഞ്ഞ സീസണിനെ അപേക്ഷിച്ച് കൂടുതല്‍ വൈവിധ്യമുള്ളൊരു ബാറ്റിങ് നിരയാണ് ഇത്തവണ തൃശൂരിന്‍റേത്. കഴിഞ്ഞ തവണത്തെ ടോപ് സ്‌കോററായ വിഷ്ണു വിനോദിന്‍റെ അഭാവം ഇതിലൂടെ മറികടക്കാന്‍ കഴിയുമെന്നാണ് ടീമിന്‍റെ പ്രതീക്ഷ. കഴിഞ്ഞ സീസണില്‍ മികച്ച പ്രകടനം കാഴ്ചവച്ച അക്ഷയ് മനോഹറും വരുണ്‍ നായനാരും രഞ്ജി ട്രോഫി കളിച്ച അഹമ്മദ് ഇമ്രാനും ഇത്തവണയും ടീമിനൊപ്പമുണ്ട്. കഴിഞ്ഞ സീസണില്‍ കൊച്ചിക്കായി തിളങ്ങിയ ഷോണ്‍ റോജര്‍ ഇത്തവണ തൃശൂരിനൊപ്പമാണ്. ഒപ്പം അരുണ്‍ പൗലോസ്, വിഷ്ണു മേനോന്‍, ആനന്ദ് കൃഷ്ണന്‍ തുടങ്ങിയ വെടിക്കെട്ട് ബാറ്റര്‍മാര്‍ കൂടി ചേരുമ്പോള്‍ തൃശൂരിന്‍റെ ബാറ്റിങ് നിര അതിശക്തമാണ്. കൂറ്റന്‍ ഷോട്ടുകളിലൂടെ ശ്രദ്ധേയനായ താരമാണ് ആനന്ദ് കൃഷ്ണന്‍. ആലപ്പി റിപ്പിള്‍സിനെതിരായ മത്സരത്തില്‍ ആനന്ദ് നേടിയ സെഞ്ച്വറി കഴിഞ്ഞ സീസണിലെ ഏറ്റവും മികച്ച ഇന്നിങ്‌സുകളിലൊന്നായിരുന്നു. 66 പന്തുകളില്‍ പുറത്താകാതെ 138 റണ്‍സാണ് ആനന്ദ് അടിച്ചെടുത്തത്.
ക്യാപ്റ്റന്‍ സിജോമോന്‍ ജോസഫ്, സി.വി. വിനോദ് കുമാര്‍ എന്നിവരടങ്ങുന്ന ഓൾറൗണ്ടര്‍മാരുടെ മികച്ചൊരു നിരയും ഇത്തവണ തൃശൂരിനുണ്ട്. പരിചയസമ്പന്നരായ ഇവര്‍ക്കൊപ്പം സിബിന്‍ ഗിരീഷ്, അമല്‍ രമേഷ്, തുടങ്ങിയവരാണ് ടീമിലെ മറ്റ് ഓള്‍റൗണ്ടര്‍മാര്‍. രണ്ടാം സീസണിലെ ഏറ്റവും പ്രായം കുറഞ്ഞ താരമായ കെ.ആർ. രോഹിത്താണ് ആരാധകര്‍ ഉറ്റു നോക്കുന്ന മറ്റൊരു താരം. അടുത്തിടെ നടന്ന എന്‍എസ്‌കെ ട്രോഫിയില്‍ ഫൈനലിലെ പ്ലെയര്‍ ഓഫ് ദി മാച്ചായി തെരഞ്ഞെടുക്കപ്പെട്ടതും രോഹിത് ആയിരുന്നു.
എം.ഡി. നിധീഷും മുഹമ്മദ് ഇഷാഖും ആനന്ദ് ജോസഫും അടക്കമുള്ളവരാണ് ടീമിന്‍റെ ബൗളിങ് കരുത്ത്. കഴിഞ്ഞ സീസണില്‍ 11 വിക്കറ്റുകളുമായി ടീമിന്‍റെ ബൗളിങ് പട്ടികയില്‍ മുന്നിട്ടുനിന്നത് മുഹമ്മദ് ഇഷാഖായിരുന്നു. കഴിഞ്ഞ തവണ ആലപ്പുഴയ്ക്കായി തിളങ്ങിയ ആനന്ദ് ജോസഫിനെ ടീമിലെത്തിക്കാനായത് തൃശൂരിന് മുതല്‍ക്കൂട്ടാകും. ആതിഫ് ബിന്‍ അഷ്‌റഫ്, ആദിത്യ വിനോദ് തുടങ്ങിയവരാണ് ബൗളിങ് നിരയിലെ മറ്റ് പ്രമുഖ താരങ്ങള്‍.
മുന്‍ രഞ്ജി താരം എസ്. സുനില്‍ കുമാറാണ് ടൈറ്റന്‍സിന്‍റെ കോച്ച്. കഴിഞ്ഞ സീസണില്‍ കോച്ചായിരുന്നു സുനില്‍ ഒയാസിസാണ് കോച്ചിങ് ഡയറക്റ്റര്‍. അസിസ്റ്റന്‍റ് കോച്ചായി കെവിന്‍ ഓസ്‌കാറും, ബാറ്റിങ് കോച്ചായി വിനന്‍ ജി. നായരും ബൗളിങ് കോച്ചായി സി.പി. ഷാഹിദും ഫീല്‍ഡിങ് കോച്ചായി മണികണ്ഠന്‍ നായരും ടീമിനൊപ്പമുണ്ട്. എസ്. മനുവാണ് പെര്‍ഫോമന്‍സ് അനലിസ്റ്റ്.
ടീം അംഗങ്ങള്‍:
ബാറ്റര്‍ - ആനന്ദ് കൃഷ്ണന്‍, അഹമ്മദ് ഇമ്രാന്‍, ഷോണ്‍ റോജര്‍, അക്ഷയ് മനോഹര്‍, കെ.ആർ. രോഹിത്, വിഷ്ണു മേനോന്‍, അരുണ്‍ പൗലോസ്, അജു പൗലോസ്.
ഓള്‍റൗണ്ടര്‍ - സി.വി. വിനോദ് കുമാര്‍, സിജോമോന്‍ ജോസഫ് (ക്യാപ്റ്റന്‍), സിബിന്‍ ഗിരീഷ്.
ഫാസ്റ്റ് ബൗളര്‍മാര്‍ - എം.ഡി. നിധീഷ്, ആനന്ദ് ജോസഫ്, ആതിഫ് ബിന്‍ അഷ്‌റഫ്, ആദിത്യ വിനോദ്.
സ്പിന്നര്‍മാര്‍ - മുഹമ്മദ് ഇഷാഖ്, അജ്‌നാസ് കെ, അമല്‍ രമേഷ്.
