ഭുവനേശ്വര്‍: പുരുഷന്മാരുടെ ഹോക്കി ലോകകപ്പില്‍ ഇന്ത്യ വെയില്‍സിനെ 4-2നു തോല്‍പ്പിച്ചു. എന്നാല്‍, ക്വാര്‍ട്ടര്‍ ഫൈനലിലെത്താന്‍ ഇന്ത്യന്‍ ടീം ഇനിയിം കാത്തിരിക്കണം. ക്വാര്‍ട്ടറില്‍ നേരിട്ട് യോഗ്യതത നേടാന്‍ വെയ്ല്‍സിനെതിരായ ഇന്ത്യക്ക് 8-0ന്‍റെ വിജയം അനിവാര്യമായിരുന്നു.
എന്നാല്‍, 2-2ന് ഒരു വേള സമനില വഴങ്ങിയ ഇന്ത്യ ഒടുവില്‍ 4-2നാണ് വിജയിച്ചത്. ഇന്ത്യക്കായി ഷാംഷെര്‍ സിംഗും(21) ആകാശ്ദീക് സിംഗും(32, 45) ഹര്‍മന്‍പ്രീത് സിംഗും(59) ഗോളുകള്‍ നേടി. ഫല്‍ലോങ് ഗാരെതും ഡ്രാപെര്‍ ജേക്കബും വെയ്ല്‍സിനായി ഗോള്‍ മടക്കി. പൂള്‍ ഡിയില്‍ ഇന്ത്യ രണ്ടാമതായാണ് ഫിനിഷ് ചെയ്തത്. കഴിഞ്ഞ മത്സരത്തില്‍ സ്പെയിനെ ഇംഗ്ലണ്ട് 4-0ന് തറപറ്റിച്ചതാണ് ഇന്ത്യക്ക് തിരിച്ചടിയായത്.
ഇംഗ്ലണ്ടിനായി 10-ാം മിനുറ്റില്‍ റോപര്‍ ഫില്ലും 21-ാം മിനുറ്റില്‍ കോന്‍ഡന്‍ ഡേവിഡും 50-ാം മിനുറ്റില്‍ ബാന്‍ഡുറാക്ക് നിക്കോളസും 51-ാം മിനുറ്റില്‍ അന്‍സെല്‍ ലയാമും ഗോളുകള്‍ നേടി. ഫില്ലിന്‍റെ ഒഴികെയുള്ള എല്ലാ ഗോളുകളും ഫീല്‍ഡ് ഗോളുകളായിരുന്നു.
ജയത്തോടെ ഗ്രൂപ്പ് ചാമ്പ്യന്‍മാരായി ഇംഗ്ലണ്ട് ഹോക്കി ടീം നേരിട്ട് ക്വാര്‍ട്ടര്‍ ഫൈനലിലെത്തി. ഗ്രൂപ്പില്‍ മുന്നിലെത്തുന്ന ടീമിന് നേരിട്ട് ക്വാര്‍ട്ടര്‍ ഫൈനല്‍ യോഗ്യതയും രണ്ടും മൂന്നും സ്ഥാനത്തുള്ള ടീമുകള്‍ ക്രോസ് ഓവര്‍ മത്സരത്തിലൂടെ യോഗ്യത ഉറപ്പാക്കുകയും വേണം.
സ്‌പെയിനിനെ ആദ്യ മത്സരത്തില്‍ തോല്‍പ്പിച്ച ഇന്ത്യ നേരത്തെ കരുത്തരായ ഇംഗ്ലണ്ടിനോട് സമനില വഴങ്ങിയിരുന്നു.
ക്രോസ് ഓവര്‍ മത്സരത്തില്‍ ഇന്ത്യക്ക് കരുത്തരായ ന്യൂസിലന്‍ഡാണ് എതിരാളികള്‍. ഈ മത്സരത്തില്‍ വിജയിച്ചാല്‍ മാത്രമേ ഇന്ത്യക്ക് അവസാന എട്ടിലെത്താന്‍ പറ്റൂ.
