പാരീസ്: ഫ്രഞ്ച് ഓപ്പണ്‍ ബാഡ്മിന്‍ണില്‍ ഇന്ത്യയുടെ സാത്വിക് സായ്‌രാജ് രങ്കിറെഡ്ഡി - ചിരാഗ് ഷെട്ടി സഖ്യം ഫൈനലില്‍. ഇത് മൂന്നാംതവണയാണ് സാത്വിക് സായ്‌രാജ് രങ്കിറെഡ്ഡി - ചിരാഗ് ഷെട്ടി സഖ്യം ഫ്രഞ്ച് ഓപ്പണില്‍ കലാശപ്പോരിനിറങ്ങുന്നത്. പാരീസില്‍ നടന്ന സെമി ഫൈനല്‍ മത്സരത്തില്‍ നിലവിലെ ലോക ചാമ്പ്യരായ കൊറിയയുടെ കങ് മിന്യൂക് - സിയോ സെങ്ജെ സഖ്യത്തെയാണ് തോല്‍പ്പിച്ചത്. 21-13, 21-16 സ്‌കോറിനാണ് ഇന്ത്യന്‍ താരങ്ങളുടെ വിജയം.
40 മിനിറ്റോളം പോരാട്ടം നീണ്ടു. ജപ്പാന്‍റെ തകുറോ ഹോകി - യുഗോകൊബയാഷി സഖ്യവും ചൈനയുടെ ലീ ഝെ - യാങ് പോ സുവാന്‍ സഖ്യവും തമ്മില്‍ നടക്കുന്ന സെമി ഫൈനല്‍ മത്സരത്തിലെ വിജയികളുമായാണ് ഫൈനലില്‍ ഇന്ത്യന്‍ സഖ്യത്തിന് ഏറ്റുമുട്ടേണ്ടത്.
2024-ല്‍ തുടര്‍ച്ചയായ മൂന്നാംതവണയാണ് ബി.ഡബ്ല്യൂ.എഫ്. ടൂര്‍ണമെന്‍റുകളില്‍ സാത്വിക് സായ്‌രാജ് രങ്കിറെഡ്ഡി - ചിരാഗ് ഷെട്ടി സഖ്യം ഫൈനലില്‍ പ്രവേശിക്കുന്നത്. പാരീസ് ഒളിമ്പിക്സിനുവേണ്ടിയുള്ള തയ്യാറെടുപ്പിലാണ് ഇരുവരും. 2024-ലെ ആദ്യ കിരീടമാണ് ഇരുവരുടെയും ലക്ഷ്യം. ഈ വര്‍ഷം രണ്ട് ടൂര്‍ണമെന്‍റുകളില്‍ ഫൈനലില്‍ പ്രവേശിച്ചെങ്കിലും വിജയിക്കാനായിരുന്നില്ല. മലേഷ്യ മാസ്റ്റേഴ്സിലും ഇന്ത്യന്‍ ഓപ്പണിലുമാണ് നേരത്തേ ഫൈനലില്‍ പരാജയപ്പെട്ടത്.
അതേസമയം, പുരുഷ സിംഗിള്‍സില്‍ ഇന്ത്യയുടെ ലക്ഷ്യ സെന്നിന്‍റെ പോരാട്ടം സെമിയില്‍ അവസാനിച്ചു. 20-23, 21-13, 21-11 എന്ന സ്‌കോറിന്‌നിലവിലെ ലോക ചാമ്പ്യന്‍ കുന്‍ലാവുട്ട് വിറ്റിഡ്സര്‍നില്‍ ആണ് ലക്ഷ്യയെ പരാജയപ്പെടുത്തിയത്.
ഫൈനലിലെത്തിയിരുന്നെങ്കില്‍ പാരീസ് ഒളിംപിക്‌സിന് ലക്ഷ്യക്ക് യോഗ്യത നേടാനാകുമായിരുന്നു. എന്നാല്‍, ഒളിംപിക്‌സ് യോഗ്യതയ്ക്ക് ഇനിയും അദ്ദേഹത്തിന് ധാരാലം അവസരങ്ങളുണ്ട്.
