മുംബൈ: ഇന്ത്യയുടെ ടി20 സൂപ്പർസ്റ്റാർ സൂര്യകുമാർ യാദവ് സ്പോർട്സ് ഹെർണിയ രോഗമുക്തിക്കായി ശസ്ത്രക്രിയയ്ക്കു വിധേയനായി. ശസ്ത്രക്രിയ വിജയകരമെന്നും വൈകാതെ മൈതാനത്തേക്കു മടങ്ങിയെത്തുമെന്നും സൂര്യകുമാർ സമൂഹമാധ്യമത്തിൽ കുറിച്ചു. തനിക്കു വേണ്ടി പ്രാർഥിച്ച ആരാധകർക്കു നന്ദിയെന്നും സൂര്യകുമാർ.
ജർമനിയിലാണു സൂര്യകുമാർ ശസ്ത്രക്രിയയ്ക്കു വിധേയനായത്. പൂർണ ശാരീരിക ക്ഷമത വീണ്ടെടുക്കാൻ ഒരു മാസം വേണ്ടിവരും. ആസന്നമായ ഐപിഎലിൽ സൂര്യകുമാർ കളിച്ചേക്കും. ഇതിനു പിന്നാലയാണ് ജൂണിൽ വെസ്റ്റ് ഇൻഡീസിലും യുഎസിലുമായി ഐസിസി ടി20 ലോകകപ്പ്. സൂര്യകുമാർ ഇല്ലാത്തൊരു ടി20 ടീം ഇപ്പോഴത്തെ നിലയിൽ ഇന്ത്യയ്ക്ക് ചിന്തിക്കാനാവില്ല.
അടുത്തിടെ നടന്ന ദക്ഷിണാഫ്രിക്കൻ പര്യടനത്തിൽ ജൊഹാന്നസ്ബെർഗിലെ മൂന്നാം ടി20 മത്സരത്തിൽ ഫീൽഡ് ചെയ്യുന്നതിനിടെ സൂര്യകുമാറിന് പരുക്കേറ്റിരുന്നു. ഇതിനൊപ്പമാണു സ്പോർട്സ് ഹെർണിയയ്ക്കുള്ള ശസ്ത്രക്രിയ ആവശ്യമായി വന്നത്.