ചെന്നൈ: പ്രശസ്ത മോഡലും ഇൻഫ്ലുവൻസറുമായ സാൻ റേച്ചൽ (ശങ്കരപ്രിയ) ജീവനൊടുക്കി. 26 വയസ്സായിരുന്നു. കരമണിക്കുപ്പത്തെ വീട്ടിൽ വച്ച് രക്തസമ്മർദത്തിനുള്ള പിൽസ് അമിതമായി കഴിച്ചതാണ് മരണ കാരണം. അവശ നിലയിലായ സാൻ റേച്ചലിനെ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. തന്‍റെ മരണത്തിന് ആരും ഉത്തരവാദിയല്ലെന്ന് വ്യക്തമാക്കിക്കൊണ്ടുള്ള കുറിപ്പും കണ്ടെത്തി. അടുത്തിടെയാണ് സാൻ റേച്ചൽ വിവാഹിതയായത്. വർണവിവേചനത്തിനെതിരേയുള്ള ശക്തമായ നിലപാടുകളിലൂടെയാണ് സാൻ റേച്ചൽ ശ്രദ്ധേയയായത്.

2020-21 വർഷത്തെ മിസ് പുതുച്ചേരിയായിരുന്നു സാൻ റേച്ചൽ. അതു കൂടാതെ 2019ൽ മിസ് ഡാർക് ക്വീൻ തമിഴ്നാട്, മിസ് വേൾഡ് ബ്ലാക് ബ്യൂടടി കാറ്റഗതി പുരസ്കാരം എന്നിവയും നേടിയിരുന്നു. സാമ്പത്തിക പ്രശ്നവും വ്യക്തിപരമായ പ്രശ്നങ്ങളുമാണ് മരണകാരണമെന്നാണ് പൊലീസ് പറയുന്നത്.

ഫാഷൻ ഷോകൾ നടത്തുന്നതിനായി വലിയ തുക വായ്പ എടുത്തിരുന്നതായും ഇതു മൂലം കടുത്ത സമ്മർദമുണ്ടായിരുന്നതായും റിപ്പോർട്ടുകൾ പറയുന്നു. പിതാവ് സാമ്പത്തികമായി സഹായിക്കുമെന്ന പ്രതീക്ഷ ഇല്ലാതായതോടെ ആഭരണങ്ങൾ വിറ്റതായും റിപ്പോർട്ടുകളുണ്ട്.