കോതമംഗലം: സാറേ എനിക്ക് എസ് ഐ സാറിന്റെ മുന്നിലൊരു പാട്ടു പാടണം. എന്റെ ഒരു ആഗ്രഹമാണ്. അയാം അനന്തപത്മനാഭൻ ഫ്രം ചിന്നപാറക്കുടി. അടിമാലി പൊലീസ് സ്റ്റേഷനിൽ എത്തിയ ചിന്നപ്പാറക്കുടി സ്വദേശി അനന്തപദ്മനാഭൻ തന്റെ ആഗ്രഹം പറഞ്ഞു. എസ് ഐ ഉദ്യോഗസ്ഥൻ അതിനുള്ള അനുവാദം നൽകിയതോടെ അനന്ദൻ ഹാപ്പി.. കൈവിരൽ കൊണ്ട് താളം പിടിച്ച് നാൽപത്തിയാറുകരനായ ഈ ഭാവഗായകൻ പാടി തുടങ്ങി....
മെല്ലെ മെല്ലെ മുഖപടം തെല്ലൊതുക്കീ
അല്ലിയാമ്പൽപ്പൂവിനെ തൊട്ടുണർത്തീ
ഒരു കുടന്ന നിലാവിന്റെ കുളിരു കോരി
നെറുകയിൽ അരുമയായ് കുടഞ്ഞതാരോ...
ഒരു മിന്നാമിനുങ്ങിന്റെ നുറുങ്ങു വെട്ടം എന്ന ചലച്ചിത്രത്തിനുവേണ്ടി ഒ എൻ വി കുറുപ്പ് എഴുതി, ജോൺസൺ മാസ്റ്റർ സംഗീതം നൽകി ഡോ. കെ. ജെ. യേശുദാസ് ആലപ്പിച്ച ഗാനം അനന്തൻ ആലപിച്ചപ്പോൾ കേട്ടു നിന്ന അടിമാലി പൊലിസ് സ്റ്റേഷനിലെ ഉദ്യോഗസ്ഥർക്കും സന്തോഷം. അവരുടെയെല്ലാം അഭിനന്ദനങ്ങൾ ഏറ്റുവാങ്ങിയാണ് ഈ ഗായകൻ പൊലീസ് സ്റ്റേഷന്റെ പടിയിറങ്ങിയത്. ഇപ്പോൾ നാട്ടിലെങ്ങും പാട്ടായി ചിന്നപ്പാറക്കുടി സംഗീതം...