പാലക്കാട്: പാലക്കാട് എംഎൽഎ രാഹുൽ മാങ്കൂട്ടത്തിലിനെതിരേ കൊലവിളി പ്രസംഗം നടത്തിയ സംഭവത്തിൽ ബിജെപി നേതാക്കൾക്കെതിരേ പൊലീസ് കേസെടുത്തു.

ബിജെപി പാലക്കാട് ജില്ലാ അധ‍്യക്ഷൻ പ്രശാന്ത് ശിവൻ, ജില്ലാ ജനറൽ സെക്രട്ടറി ഓമനകുട്ടൻ എന്നിവർക്കെതിരേയാണ് വീഡിയോ ദൃശ‍്യങ്ങൾ പരിശോധിച്ച് കേസെടുത്തിരിക്കുന്നത്. പാലക്കാട് ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് സി.വി. സതീഷിന്‍റെ പരാതിയിലാണ് നടപടി.

പാലക്കാട് നഗരസഭയിലെ ഭിന്നശേഷി നൈപുണ‍്യ കേന്ദ്രത്തിന് ആർഎസ്എസ് സ്ഥാപകൻ കെ.ബി. ഹെഡ്ഗേവാറിന്‍റെ പേരിടാനുള്ള നീക്കം വിവാദമാക്കിയ നടപടിയിൽ പ്രതിഷേധിച്ച് എംഎൽഎയുടെ ഓഫീസിലേക്ക് ബിജെപി പ്രവർത്തകർ നടത്തിയ മാർച്ചിനിടെയായിരുന്നു കൊലവിളി പ്രസംഗം.

രാഹുലിനെ പാലക്കാട് കാലുകുത്താൻ അനുവദിക്കില്ലെന്നും രാഹുലിന്‍റെ കാൽ തറയിലുണ്ടാകില്ലെന്നും തല ആകാശത്തു കാണേണ്ടി വരുമെന്നുമായിരുന്നു ബിജെപി നേതാക്കളുടെ ഭീഷണി.